Unua paĝo >> Kuirarto >> Ĉina gastronomio


Vegetalisma restoracio Putiyuan

Kiu povas kredi, ke tiuj ĉi pladoj estas faritaj el toŭfuo, amorfofala amelo kaj aliaj legomoj? Ili similas al pladoj faritaj el veraj fiŝo kaj viando ne nur aspekte, sed ankaŭ guste. Jen ĉinaj vegetalismaj manĝaĵoj.

Ĉinaj vegetalismaj restoracioj donas grandan atenton ne nur al la gusto de siaj pladoj, sed ankaŭ al la medio de siaj ejoj. Pere de tiu ĉi artikolo mi invitu vin kune viziti la vegetalisman restoracion Putiyuan.

La Red.

La restoracio sidas sudoriente en Pekino kaj najbaras al la pitoreska parko. Je la unua vido mi misprenis ĝin templo. En ĝiaj tri kortoj kun grizaj muroj verdas plantoj, sub la alero de la domoj pendas ruĝaj lanternoj. La restoracion kun antikveco regas agrabla budhisma muziko.

Ĉar la mastro de la restoracio kredas je la tibeta budhismo, la dekoracio de la restoracio portas koloron de la tibeta budhismo; ĉar tie estas ejo por budhistoj manĝi kaj fari religian riton, la restoracio liveras ne nur vegetalismajn manĝaĵojn, sed ankaŭ budhistan teon kaj aliajn temantajn pri budhisma kulturo. La restoracio sin malfermas al la tuta socio.

La tri kortoj de la restoracio havas ĉiu sian propran funkcion. En la antaŭa korto servas tetrinkejo kaj manĝejo. La budhista teo de la restoracio estas unika en Pekino. Majstro Xie Yiyuan laboranta ĉi tie estas vaste konata en Pekino kiel reĝo de vegetalismaj manĝaĵoj kaj ege lertas en teoceremonio. Unufoje li povas prepari 7 specojn da teo. Bonzoj de Pekino ofte venas ĝui teon. La budhista teo utilas al vidado kaj aŭdado. Oni povas pasigi tutan posttagmezon ĉi tie trinkante teon kaj frandante diversajn kortegajn kukojn kaj vegetalismajn kolazionojn.

La meza korto estas eksponejo de budhisma kulturo. Meze staras budha halo, kie oni kultas la tri okcidentajn sanktulojn de budhismo. Antaŭ la halo belas floroj omaĝe al la budho. Oni lavas la manojn, demetas la ŝuojn, faras voton kun la manoj kunpremitaj kaj poste prezentas freŝajn florojn al la budho.

En la malantaŭa ĝardeno prosperas 430-jara soforo, nomata Svatanta Arbo, kiu benas kaj protektas feliĉan edzecon. En antikveco, tiuj, kiuj deziris feliĉan edzecon, ligis ruĝan ŝnuron kaj benopetan tabuleton al branĉoj de tiu ĉi soforo, ripetante en si la nomon de la amato. Tiele realiĝos la deziro. Ankaŭ nun la arbo kaj balustrado ĉirkaŭ la arbo estas plenaj de ruĝaj benopetaj tabuletoj. La petantoj devas 3-foje rondiri sur la vojo pavimita per rulŝtonoj ĉirkaŭ la soforo kaj poste faras voton kun sincereco starante sur antikva ŝtono sub la arbo. Se oni skribas la nomon sur la benopetan tabulon, pendigos ĝin sur la arbo, oni ĝuos feliĉan kaj longtempan edzecon.

Vizitinte la kortojn, ni venu al ĝia malgranda manĝejo kun Dunhuang-a fresko ĉirkaŭe sur muroj kaj kune ĝuu kelkajn tieajn vegetalismajn pladojn.

La vegetalismaj manĝaĵoj de la restoracio kunfandas belecon, bongustecon kaj delikatecon. La tieaj kuiristoj lertas en preparado de menuo de pli ol cent pladoj el toŭfuo, amorfofala amelo, fungo kaj aliaj legomoj. Plej gravas, ke vegetara dieto utilas al la sano.

"Fiŝo en supo" kun Sichuan-aj trajtoj estas farita el vegetalaj materialoj laŭ la tiea sekreta recepto. La plado kun sojfabaj ĝermoj kaj pecetoj de laktuko sufiĉe infuzitaj en delikata kaj pika supo estas vaste ŝatata.

"Dongpo-viandaĵo" el toŭfuo en ora koloro kun sekigita brasiko kaj taro estas bongusta je vianda odoro kaj legoma delikateco.

"Vegetala korbeto de Qianlong" estas farita el ŝelo de melono aŭ oranĝo farĉita per diversaj legomoj kaj vegetala ŝinko. Somere la korbeto estas el melono kaj vintre — el oranĝo. La plado apetiton vekas ne nur pro bela formo, sed ankaŭ aromo de legomoj kaj frukto.

La tieaj kukoj, kvankam sen ovo, tamen kun densa odoro, estas faritaj el glueca rizo per originala tekniko. Ili ĉiuj jam estas artaĵoj. Ekz., tiu ĉi kuko estas delikate skulptita kiel longeviva maljunulo.

En la korto kun antikveco oni aŭskultas budhisman muzikon, aprecas tradiciajn freskojn kaj manĝas vegetalismajn frandaĵojn, trinkante freŝan fruktosukon aŭ bieron sen alkoholo... Jen aparta ĝuo en la vegetalisma restoracio Putiyuan.

Adr.: 10-16# Heiyaochang-strato

Xuanwu-distrikto, Pekino

Tel.: ++86-10-63557348/63546155/63542889