En Yunnan-provinco, sudokcidenta Ĉinio, troviĝas 18 originalaj moroj. Flormanĝado estas unu el ili. Lokanoj prenas freŝajn florojn ne nur kiel ornamajn plantojn, sed ankaǔ kiel manĝaĵon. Preskaǔ ĉiuj manĝeblaj floroj estas enlistigitaj en ilian menuon.

Ĉinaj botanikistoj konfirmis, ke en Yunnan estas pli ol 2500 specoj da sovaĝaj plantoj, inter kies floroj multaj manĝeblas, ekz. kapokfloro, orkideo, jasmena floro, rododendro, magnolio k.a. Yunnan-anoj amas florojn kaj domaĝas florojn baldaǔ velkontajn. Antaŭ ol forpasas florperiodo, knabinoj venas kun korbo sur la dorso al monta deklivo. Kantante montkanton ili kolektas manĝeblajn florojn por fari el ili diversajn pladojn.

En taj-aj restoracioj oni povas trovi pladojn el floroj kun bela nomo. En aprilo de 2005 mi vizitis la Xishuangbanna-an Taj-an Aǔtonoman Subprovincon kaj en bambua domo en taj-a stilo ĝuis bankedon el floroj kaj persone spertis ilian apartan kulturon pri flormanĝado.

Mi sidis ĉe bambua tablo plena de diversaj pladoj el floroj en koloroj, kiaj fajroruĝa, jadablanka, orflava kaj blua. El ili troviĝis kapokfloro fritita kun faboj, salato el freŝaj pirfloroj, floroj miksataj kun pipra misoo, kuiritaj baŝofloroj ktp. Tradiciaj taj-aj manĝaĵoj plejparte estas preparitaj kun vinagro, pipro kaj aliaj kondimentoj en densa gusto, tamen iliaj pladoj el floroj kun natura gusto akcentas siajn aspekton kaj koloron.

En Yunnan-provinco vivas 26 nacimalplimultoj. Ili ĉiuj havas kutimon de floromanĝado.

Fakte, floroj ne nur estas manĝeblaj legomoj, sed ankaǔ havas kuracan efikon. Kamelia floro efikas por kuraci pulmo-febron kaj hematemezon, montzingibra floro efikas por sanigi stomakon kaj lienon... Floroj konsistigas duonon de atlaso pri drogherboj, kaj pli ol 50% de tiuj floroj estas ofte manĝataj de nacimalplimultoj.