La Anhui-a gastronomio estas unu el la ĉefaj 8 kulinaraj stiloj de Ĉinio. Ĝiaj formiĝo kaj evoluo rilatas al lokaj geografia medio, produktaĵoj, kutimo kaj moroj.

Anhui-provinco situas en sudorienta Ĉinio. En la provinco troviĝas la famaj, grandiozaj kaj belaj montoj Huangshan, Jiuhua, Dabie kaj Tianzhu. La riveroj Yangzi kaj Huaihe orient-okcidenten trafluas la provincon kaj dividas ĝin en 3 partojn. En la regiono sude de Yangzi-rivero abundas diversaj raraj manĝeblaj montkreskaĵoj kaj animaloj; sur la stepo norde de Huaihe-rivero — grenoj de plantoj, legomoj, fruktoj, kortobirdoj kaj hejmaj bestoj; inter la du riveroj troviĝas montetaroj kaj lagoj, kie estas unu el plej gravaj bazoj dolĉakvaj produktaĵoj en Ĉinio.

La Anhui-a gastronomio konsistas el 3 gustoj de suda Anhui, Yangzi-baseno kaj Huaihe-baseno. Tiu de suda Anhui originas de Huizhou-aj pladoj kaj konsistigas gravan parton de la Anhui-a gastronomio. Oni preparas la pladojn ĉefe per rostado kaj stufado, aldonante ŝinkon kaj kandon, kaj akcentante fajron. Iuj pladoj estas stufitaj per lignokarba fajro. "Hangshan-a kolombo stufita" kaj "Huizhou-a fabokazeo" estas ĝiaj reprezentaj pladoj. La pladoj de Yangzi-baseno estas preparataj ĉefe el riverproduktaĵoj kaj kortobirdoj per frikasado, vaporumado kaj bukanado. En la preparado oni aldonas sukeron kaj atentas tranĉadon, formon kaj koloron de la pladoj, kiuj karakteriziĝas per delikateco, freŝeco kaj bonodoreco. Ĝiaj reprezentaj pladoj estas "Tonika koko fritita" kaj "Fiŝo rostita". La pladoj de la baseno Huaihe karakteriziĝas per delikateco, saleco, freŝeco kaj refreŝigeco, la ĉefaj kuirmanieroj estas rostado kaj fritado, kaj oni ofte uzas koriandron kaj paprikon por spici kaj dekori la pladojn. "Dika fiŝo kun lakto" kaj "Ŝafaĵo fritita" estas ĝiaj reprezentaj pladoj.

Se vi volas gustumi supre menciitajn pladojn, bonvolu viziti Hefei, ĉefurbon de Anhui-provinco.