La 16-an de majo jarkunveno de la Konsilio de la Afrika Disvolva Banka Grupo de 2007 inaŭguriĝis en la Internacia Kongresa Centro en Ŝanhajo. Ĉina ĉefministro Wen Jiabao faris paroladon en la inaŭguro.

La kunvenon ĉeestis Paul Kagame, prezidento de Rvando, Pedro Pires, prezidento de Verdakabaj Insuloj, Marc Ravalomanana, prezidento de Madagaskaro kaj Donald Kaberuka, estro de la Afrika Disvolva Banko.

La temo de la jarkunveno estas "Afriko kaj Azio - disvolvaj partneroj". Oni diskutos pri infrastruktura konstruado en Afriko, tutregioniĝo kaj forigo de malriĉeco.

La jarkunveno unuafoje okazis en Azio kaj duafoje ekster Afriko. Du tagojn daŭros la jarkunveno kune gastigita de la Ĉina Popola Banko, koncernaj ministerioj kaj la ŝanhaja registaro.

Zhou Xiaochuan, estro de la Ĉina Popola Banko, servis kiel prezidanto de ĝia konsilio. En la kunveno partoprenis ĉ. 2000 personoj, kiaj ministroj de financo, ekonomio kaj industrio de la membrolandoj kaj estroj de centraj bankoj kaj reprezentantoj de la Monda Banko, la Internacia Mon-Fonduso, financaj disvolvaj institucioj kaj neregistaraj organizoj.

La Afrika Disvolva Banko establiĝis en 1964 kun la konsilio kiel ĝia plej alta decida institucio. Ĝi havas 77 membrolandojn, inkl. de 53 afrikaj landoj kaj 24 landoj ekster Afriko. Ĉinio aliĝis al ĝi en 1985.