En la 27-a de oktobro okazis la Unua Esperanta Posttagmezo
de la Urbo Japeri. La renkontiĝon organizis la Kultura Kooperativo
de Esperantistoj (KKE) kaj Niterói Esperanto-klubo (NITEK). Pli
ol 50 esperantistoj kaj 150 studantoj partoprenis.
Japeri estas malriĉa urbeto situanta ĉirkaŭ 80 kilometroj
for de Rio-de-Ĵanejro. Tie oni malofte organizas kulturajn eventojn.
Tial la prezidanto de NITEK, Walter Rosa Fontes, decidis mobilizi
la tiean socion. Li intencis realigi allogan Esperantan renkontiĝon
kvazaŭ sciencan foiron.
La urbestro apogis la iniciaton kaj disponigis kvin
tendojn por la organiza komitato. La direktorino de la publika
lernejo CIEP 207 permesis, ke la evento okazu tie. Lokaj religiaj
aŭtoritatoj publike aprobis kaj benis la ideon.
KKE, NITEK, Esperanta Kunfratiĝo de Okcidenta Regiono
de Rio-de-Ĵanejro (EKOR), Legio de Bona Volo (LBV) kaj Eldonejo
Lorenz okupis la tendojn por ekspozicii kaj vendi librojn kaj
aliajn Esperantaĵojn. Okazis ankaŭ paroladoj kaj artaj prezentadoj.
Dum sia prelego, Walter Fontes emociiĝis, kiam li
rememoris sian infanecon. Ĝis li estis 8-jara ne ekzistis elektra
lumo en Japeri kaj la poŝtisto iris tien po unu fojo monate. Malgraŭ
tiaj malfavoraj kondiĉoj li eklernis Esperanton kaj komencis korespondadi
kun eksterlandanoj. Tio mirigis eĉ la poŝtiston, kiu kutime alportis
multajn leterojn el pluraj partoj de la mondo.
Oni povas konsideri, ke la evento estis efektive
kontentiga. Laŭ la organizintoj la Unua Esperanta Posttagmezo
de Urbo Japeri plene trafis la celon, nome alporti kulturon kaj
civitanecon pere de Esperanto al la tiea komunumo. Pro la favora
reago de la studantoj oni povas antaŭvidi, ke la renkontiĝo denove
okazos en la venontaj jaroj.
(Fabiano Henrique)
|