Vespere de la 31-a de decembro, 2007, okazis en Pekino aktivado "Bonvenigi Olimpikojn, beni Pekinon" organizita de la Organiza Komitato de la Pekinaj Olimpikoj. Ĝin ĉeestis ĉ. 4000 homoj el diversaj rondoj de Pekino, malgraŭ ke la temperaturo falis 5 gradojn sub la nulo de Celsio.

Je la nula horo de la 1-a de januaro, 2008, granda brile iluminata instalaĵo kun la slogano "Ni estas pretaj" estis kune lanĉita de Duan Shijie, vicestro de la Ŝtata Sporta Administracio de Ĉinio, Jiang Xiaoyu, plenuma vicprezidanto de la Organiza Komitato de la Pekinaj Olimpikoj kaj Tang Xiaoquan, prezidanto de la Ĉina Federacio de Handikapuloj kaj plenuma vicprezidanto de la Organiza Komitato de la Pekinaj Olimpikoj.

Dum la aktivado oni vidigis pere de giganta ekrano aktivadojn de bonvenigo de la Olimpikoj de Hongkong, Qingdao, Ŝanhajo, Qinhuangdao, Shenyang kaj Tianjin, kunorganizantaj urboj de la Pekinaj Olimpikoj.