La 17-an de majo Hu Jintao, ĝenerala sekretario de la Centra Komitato de la Komunista Partio de Ĉinio (KPĈ), ĉina prezidanto kaj prezidanto de la Centra Militafera Komisiono, venis al la gubernio Wenchuan en la centro de la tertremo en Sichuan por gvidi la savadon.

En la Beichuan-a Mezlernejo Hu Jintao kuraĝigis savantajn armeanojn, ke ili, malgraŭ lacego, daŭrigu la kontraŭtertreman batalon kun granda peno por malpliigi la perdon ĝis la minimumo. Li venis ankaŭ al lokaj fabrikoj grave trafitaj de la tertremo kaj kuraĝigis laboristojn, ke ili, bone farante la savadon, komencu la laborojn pri restartigo de produktado kaj rekonstruado de la fabrikoj.

Vespere de tiu ĉi tago li prezidis en la urbo Chengdu kunvenon por aŭskulti raporton pri la savado kaj aranĝi la sekvan laboron. En sia parolo li emfazis, ke la batalo kontraŭ la tertremo estas ankoraŭ tre serioza; la tasko estas peniga kaj la tempo urĝas; diversnivelaj kompartiaj komitatoj, registaroj kaj koncernaj departementoj de la centra registaro devas rezolute efektivigi la decidon kaj aranĝon de la centra registaro kaj preni la savadon kiel la plej urĝan taskon. Li montris, ke oni devas kiel eble plej rapide serĉi kaj savi popol-amasojn restantajn en faligitaj konstruaĵoj, plenforte sukurigi vunditojn, bone aranĝi vivon de la popolanoj suferintaj de la katastrofo per ĉiu ebla rimedo, intensigi riparadon de la bazaj instalaĵoj detruitaj de la tertremo kaj fari preparon por la rekonstruado.