Laŭ la lun-kalendaro ĉi-jare la 14-a de septembro estas la tradicia festo de Ĉinio -- Mezaŭtuna Festo, kaj dume okazas en Pekino la Handikapulaj Olimpikoj. Oni ne nur atentas la konkursojn, sed ankaŭ donas bondezirojn al handikapitaj sportistoj el diversaj landoj.

La handikapitaj sportistoj el diversaj landoj mem spertis la ĉinan kulturon. En la lastaj tagoj oni metis libretojn en multaj lingvoj pri la origino de la Mezaŭtuna Festo sur manĝotabloj, kaj la "vilaĝanoj" ankaŭ gustumis lun-kukojn diversgustajn. Armbruster Jennifer, estro de la Virina Blindula Golpilka Teamo de Usono, diris, ke dum la Mezaŭtuna Festo ĉinoj kunigas familianojn kaj kune manĝas lun-kukojn, tio estas simila al la Dankodona Tago de Usono. Xavier Gonzalez, ĉefa ekzekutiva oficisto de la Internacia Handikapula Olimpika Komitato, diris: "Ĝi estas la unua Mezaŭtuna Festo, kiun mi ĝuis en Pekino, kaj mi memoros la neordinaran feston por ĉiam."

Vespere de la 14-a de septembro oni aranĝis en la Handikapula Olimpika Vilaĝo artan vesperon, kiu allogis multajn sportistojn, oficistojn kaj volontulojn.