Okaze de la Monda Aidosa Tago (la 1-a de decembro), ĉina ĉefministro Wen Jiabao veturis al Fuyang-urbo, Anhui-provinco en orienta Ĉinio la 29-an de novembro por viziti aidoso-malsanulojn, aidoso-orfojn, kuracistojn kaj flegistinojn kaj koni la situacion de preventado kaj kuracado de aidoso.

Wen Jiabao diris, ke la aidoso-malsanuloj kaj aidoso-orfoj estas speciala hom-grupo, oni devas garantii ilian minimuman vivtenadon. Krome, oni devas fari necesan propagandon kaj edukadon por krei bonan socian etoson, ke ĉiuj prizorgu kaj helpu aidoso-malsanulojn.

Wen Jiabao emfazis, ke nun oni devas bone fari jenajn aferojn: unue, efektivigi koncernajn ŝtatajn politikojn favore al la aidoso-malsanuloj kaj iliaj familioj; due, akceli preventadon kaj kuracadon de aidoso por hom-grupoj kaj regionoj serioze minacataj de aidoso kaj altigi efikecon de tiu laboro; trie, pliigi registaran investon al tiu laboro jaron post jaro; kvare, meti medikamentojn kontraŭ aidoso en la baza medikamenta listo de la ŝtato kaj intensigi koncernajn trejnadon al kuracistoj por preventi kaj superregi aidoson.