La 28-an de decembro Clark Randt, usona ambasadoro en Ĉinio, diris al raportistoj, ĉeestante la novjaran akcepton aranĝitan de la Ministerio de Eksteraj Aferoj de Ĉinio, "En la 30 jaroj post stariĝo de diplomatiaj rilatoj inter Usono kaj Ĉinio la du landoj trapasis malfacilojn, tamen la dulandaj rilatoj havis grandan progreson. Mi esperas, ke la rilatoj daǔre disvolviĝos."

Li diris, ke en la venonta monato okazos en Pekino serio da aktivadoj por celebri la 30-jariĝon de la stariĝo de ĉin-usonaj diplomatiaj rilatoj. La aktivadojn ĉeestos ankaǔ ŝtata sekretario de Usono Condoleezza Rice, usona eksprezidento Jimmy Carter, antaŭa asistanto de usona nacia sekureco Zbigniew Brzezinski, antaŭa usona ŝtata sekretario Henry Kissinger kaj aliaj antaŭaj usonaj ambasadoroj en Ĉinio.

Randt alte taksis la atingojn de Ĉinio en diplomatio en 2008. "Ĉinio multe sukcesis en la Pekinaj Olimpikoj kaj aliaj grandaj eventoj. Pri la diplomatia laboro mi donas al vi altan takson. Ĉina diplomatio estas tre profesia."

Parolante pri tendenco de la uson-ĉinaj rilatoj post enoficiĝo de Barack Obama, Randt diris: "La dulandaj rilatoj prezentas al ni bonan perspektivon. Kaj plie ili pliboniĝos en la estonteco."