La 26-an de februaro, ĉina ŝtata prezidanto Hu Jintao kaj ĉefministro Wen Jiabao respektive intervidiĝis en Pekino kun usona ŝtata sekretariino Condoleezza Rice. Hu Jintao esprimis, ke Ĉinio kaj Usono persistu en la granda direkto de disvolvo de konstruiva kunlaboro.

Hu Jintao diris, ke Ĉinio volas ĉiam teni la rilatojn kun Usono laŭ longtempa vidpunkto kaj strategia alteco, fortigi dialogon kaj interkonsiliĝon, pliigi interkomprenon kaj konfidon, plivastigi komunan konon kaj kunlaboron, racie trakti gravajn aferojn pri duflankaj interesoj, precipe serioze trakti la Taiwan-an problemon, firme bremsi riskon de secesia forto de "Taiwan-a sendependigo", protekti pacon kaj stabilecon de la Taiwan-a markolo kaj la Azi-Pacifika regiono kaj garantii kontinuan, sanan kaj stabilan disvolvon de la konstruivaj kunlaboraj rilatoj inter Ĉinio kaj Usono.

Condoleezza Rice diris, ke Usono multfoje montris la starpunkton en la problemo de "plebiscito por aliĝo al UN" de la Taiwan-a instanco, kaj opinias, ke ne devas okazi "plebiscito por aliĝo al UN".

Dum la intervidiĝo kun Condoleezza Rice, ĉina ĉefministro Wen Jiabao esprimis, ke nun en internacia politika kaj ekonomia situacio, ekzistas multaj necertaj faktoroj, tial garantio de sana kaj stabila disvolvo de la rilatoj inter Ĉinio kaj Usono estas tre grava. La du flankoj devas laŭ strategia alteco kaj longtempa vidpunkto rigardi kaj teni la dulandajn rilatojn, pliigi konfidon, vastigi kunlaboron kaj kune protekti la malfacile establitajn rilatojn inter Ĉinio kaj Usono.

Condoleezza Rice esprimis, ke kunlaboro inter Usono kaj Ĉinio helpas pli bone solvi komplikajn kaj malfacilajn problemojn alfrontatajn de la internacia sistemo. Usono volas plue antaŭenpuŝi la rilatojn inter Usono kaj Ĉinio.