Pekinaj esperantistoj

Matene de la 24-a de majo per Skajpa retosistemo videokonversaciis ĉirkaǔ du horojn esperantistoj el Pekino, Nankino kaj Sankta-Luizo de Usono. Tiam usonaj esperantistoj kunvenis por la 57-a Tutlanda Esperanto-Kongreso en Sankta-Luizo.

Laǔlum (maldekstre)

Pekinaj esperantistoj en la sidejo de la Ĉina Esperanto-Ligo konigis la nunan situacion de la ĉina E-movado. Laǔlum, membro de la Akademio de Esperanto, prezentis sian novan E-tradukaĵon Pilgrimo al la Okcidento kaj respondis demandojn de usonaj interesatoj.

Nankinaj esperantistoj

S-ino Cui Jianhua, prezidanto de la Jiangsu-a Esperanto-Asocio, koncize prezentis Nankinan Universitaton kie ŝi laboras, la urbon Nankino kaj la lokan E-movadon. Ŝi ankaŭ invitis usonajn amikojn viziti sian hejmurbon. S-ro Dennis Keefe, usona esperantisto laboranta en la Nankina Universitato, parolis pri la Unua Lingvofestivalo okazigita en Nankino. Li diris, ke la festivalo estis fruktoriĉa, ĉar post ĝia okazo funkciis pluraj Esperanto-kursoj, kiuj allogis multajn junajn esperantistojn. S-ino Wang Lin, estro de la Esperanta art-trupo de la Jiangsu-a Esperanto-Asocio, dancis mongolan dancon kaj kantis.

Wang Lin dancas.

Ĉinaj ĉeestantoj sentis, ke la mondo jam malgrandiĝis, kaj la samlingveco proksimigas la homojn.