E-instruistoj je la dispono de chiuj

    Ekde oktobro 2002 la Afrika Oficejo de UEA en Lome, Togolando, metas je la dispono de chiuj E-organizajhoj (landaj asocioj, kluboj ktp) E-instruistojn. Tiuj E-instruistoj estas disponeblaj dum la tuta jaro escepte de decembro kaj helpos vin organizi ion ajn Esperantan. Do se nun vi intencas organizi kurson por gekomencantoj kaj perfektigajn kursojn en via lando, bonvolu tuj kontaktighi kun la Afrika Oficejo de UEA. Sed vi nepre devas sendi la petleteron por E-instruistoj al la Afrika Oficejo de UEA rete <afrikaoficejo@hotmail.com> au helikposhte (B.P 13169 Lome Togo) tri monatojn antau la dato de la arangho por la afrikanoj kaj ses monatojn por la eksterafrikanoj.

    Kune ni verdigu la mondon per la lingvo de Zamenhof.

(Afrika Oficejo de UEA)

 

La 9-a Togolanda Esperanto-Kongreso okazinta

    La 9-a Togolanda Esperanto-Kongreso okazis en Togoville de la 26-a ghis la 31-a de decembro 2001. Ghin partoprenis 148 geesperantistoj el Belgio, Benino, Ebura Bordo, Ganao, Nigherio, Italio kaj Togolando, kiuj intershanghis ideojn pri la temo: "Afriko, espero por Esperanto; Esperanto, espero por Afriko".

    La kongreso konsciis, ke Esperanto ludas gravan rolon por amikeco kaj fratigho de la tuta homaro; la kongreso notis, ke la Esperanto-movado plufloras en Afriko, precipe en Togolando; la kongreso rimarkis, ke Afriko, chefe Togolando, pro la juneco de sia esperantistaro, estas oportuna kaj fekunda grundo por Esperanto; la kongreso sciis, ke Esperanto instigas al egaleco chiukampe kaj protektas rajtojn de chiuj kaj chiaj popoloj; kaj la kongreso rekomendis, ke la instancoj de la Esperanto-movado, la diversaj organizoj, la helpemuloj kunlaborantaj kun Afriko precipe kun Togolando daure subtenu edukadon al pli alta nivelo de la junuloj, kiuj estas espero por Esperanto en Afriko, kaj ke chiuj esperantistoj togolandaj daure agadu kaj batalu en sia chiutaga vivo por realigi la celojn de la movado.

(Gbeglo Koffi <esp.togo@cafe.tg>)

 

Alighu al afrika agado

    Afrikaj esperantistoj pli kaj pli bone mastras la modernajn komunikilojn. Diskut-rondojn kaj hejmpaghojn ili kreas en la TutTera-Teksajho pri Esperanto en Afriko kaj Afriko en Esperantujo:

  1) Agado en Afriko: arigas esperantistojn interesighantajn pri la Afrika Agado. Lau la jhus elektita termino, temas pri Esperantistaj Amikoj de Afrikaj Esperantistoj (EAAE). Ankau afrikano povas alighi al la grupo. Por alighi sendu mesaghon al <agado-en-afriko-subscribe@egroups.com> au <esp.togo@cafe.tg>.

  2) Esperantistoj Afrikaj: arigas la afrikanojn, kiuj interrilatas por diskuti pri la Afrika Agado. Ankau eksterafrikanoj povas alighi al la grupo. Por alighi sendu mesaghon al <esp.togo@cafe.tg> au <esperantistoj_afrikaj-subscribe@egroups.com>.

  3) Esperanto en Togolando: diskut-rondo de esperantistoj, kiuj ricevas la periodajhojn togolandajn kaj gravajn informojn pri la pashoj de la la togolanda movado. Por alighi sendu mesaghon al <esp.togo@cafe.tg> au <esperanto-en-togolando-subscribe@egroups.com>.

(Gbeglo Koffi)

 

Esperanto en lernejo

    Esperanto pli kaj pli penetradas en lernejojn de Togo. S-ro Adokpe Tokouda Raymond instruas la lingvon al chiuj lernantoj de la privata kolegio "Le Savoir" de Lome. De la unua ghis la kvara klaso chiuj lernantoj partoprenas la Esperanto-kurson. En la horartabelo chiu klaso havas unu lernohoron en chiu semajno. Salutvortojn vi povas sendi al tiu kolegio, kiu shatas ankau korespondi kaj ghemelighi kun aliaj lernejoj. Bonvolu kontaktighi kun Adokpe Tokouda Raymond, College "Le Savoir", B.P. 494, Lome, Togo. En la apuda kolegio s-ro Gbeglo Koffi instruas al kelkaj lernantoj. De la 9-a ghis la 13-a de aprilo ili prezentis la lingvon al aliaj lernantoj kaj invititoj dum kultura semajno. Ili shatos sendi informojn kaj raportetojn pri tiu sukcesa prezentado al vi, se vi skribas al: Ceg Anfame, Ired golfe, B.P. 80252, Lome, Togo.

(el "Forumo de Esperanto Nederland")

1. 2.