La
koncerto de la antikva muziko de nashi-oj sin lokis en antikva korto
de lokano, kies areo egalas al la ludkampo de korbopilko. La scenejo,
kiu okupas duonon de la korto, estis kloshita de rugha koloro: freshrughaj
kurtenoj, rughaj pendajhoj kun versparaj kaligrafajhoj, antikvastilaj
rekvizitoj malhelrughe lakitaj... Prilumate de oranghkoloraj lampoj,
mistereco kaj antikveco regis la korton. Sur la tero de la korto
sternighis dika tavolo da pinaj branchajhoj, kaj la agrabla aromo
de pino saturis la korton. Oni diris, ke tia arangho estas la plej
alta soleno por la ludado de la antikva muziko de nashi-oj.
Antaue la antikva
muziko de nashi-oj estis ludata nur en la Printempa Festo, same
kiel la novjara koncerto en la Ora Halo de Vieno. Fakte la antikva
muziko de nashi-oj estis longhistoria religia muziko origininta
en la mezo de Chinio, kie prosperis la kulturo.
En la 3-a jarcento,
fama china strategiisto kaj muzikisto Zhuge Liang vivis longan tempon
en la nashi-a loko en Lijiang-gubernio en la limregiono de la sudokcidenta
provinco Yunnan, kie dense loghas nashi-oj. Oni kredis, ke Zhuge
Liang enkondukis la muzikon de meza Chinio chi tien. Sed muzikisto
s-ro Xuan Ke, tre fama en la loko, asertis post esploro, ke la antikva
muziko de nashi-oj originis de la religia kaj palaca muzikoj de
la dinastioj Tang (618-907) kaj Song (960-1279). Tiu periodo estis
la plej brila pro la imponeco de la kulturo kaj multnombreco de
famaj verkistoj kaj poetoj. Dum alia opinio estas, ke la antikva
muziko de nashi-oj estis alportita de la migrintoj el la mezo de
Chinio al Yunnan, kiuj fughis de milita tumulto. Malgrau la malsamaj
asertoj, la antikva muziko de nashi-oj estas fidele heredita kaj
oni povas ghui tiun muzikon nomatan kiel "viva fosilio".
La 30 membroj
de la orkestro portas sur si antikvajn chinajn vestojn kaj havas
barbon. Kiam la muzikistoj malrapide iras sur la scenejon, la auskultantoj
sentas antikvecon kaj delikatecon. Eble la meznombra agho de tiu
orkestro estas la plej granda inter tiuj de la orkestroj de la mondo.
Du trionoj de la membroj aghas pli ol 65 jarojn, kaj 7 el ili
pli ol 80 jarojn. La plej agha el ili estas 89-jara, por kiu ludo
de la antikva muziko estas granda plezuro. En la orkestro estas
ankau 3 junaj kantistinoj.
La orkestro
uzas antikvajn popolajn muzikilojn de Chinio, ekzemple bambua fluto,
antikva kordinstrumento Zheng, trikordulo, cimbalo kaj tamburo.
La ludado komencighas
per urgha tamburado, kaj chiu muzikopeco estas estrata de fluto.
Rusa turisto tiele priskribis la muzikoludon: "La muziko audighas
per neimageble bela melodio, kvazau akva kurteno falinta de sur
jada ekrano; kiam la muziko malproksimighas kune kun la tintado
de malgrandaj sonoriletoj, shajnas, ke gemoj falas
en akvon kaj estigas ondetojn
" En la fino kantistinoj
ekkantas per sia natura vocho, kaj la bela muziko soras rekte sur
la chielon.
Dum ludado kaj la
auskultantoj kaj la ludantoj estas tre piaj. Nashi-oj admiras la antikvan
muzikon same kiel Vienanoj Strauss Johann. Ili prenas la antikvan
muzikon kiel rimedon por interkomuniki kun la dioj sur la chielo,
kaj kiam ili ludas la muzikon, ili kredas, ke dioj sur la chielo estas
absorbite auskultas la ludon.
Prapatroj de
nashi-oj kredis je dio kaj kreis primitivan shamanan politeismon
"Dongba". En la nashi-a lingvo "dongba" signifas
"homon multscian kaj saghan". Poste "dongba"
farighis sinonimo de pastro. Dum sakramento la religianoj ne nur
kultas diojn per muziko,
sed ankau legas "Dongbaan sutron" notitan per antikva
hieroglifo. La hieroglifo, "Dongbaa sutro", kulta kanto
kaj danco, sakramento kaj la beletro rilatanta kun la religio konsistigas
la nacian kulturon la Dongbaan kulturon misteran kaj originalan.
En la pasinteco
la ludantoj de la muziko devis esti renomaj homoj de la loko. En
Lijiang, kompetenteco en ludo de tiu muziko estis nepre necesa kvalifikiteco
por la viroj de la bonhavaj familioj, kiuj volis farighi erudiciuloj
au membroj de la tiea mondumo.
Nun la antikva muziko frontas embarason
de manko de daurigantoj, char ghiaj interesatoj chefe estas maljunuloj
kaj fremdlandaj turistoj, dum la junuloj estas forlogitaj de popmuziko.
Chiujare mortas membroj de la orkestro, sed ilia arto ne trovas
heredanton.
Kaj krome la orkestro estas embarasita ankau de financa malfacilo.
Rilata
materialo
Antikva
dongba-a kulturo
|