Jiuzhaigou situas 400 kilometrojn norde de Chengdu, la chefurbo de Sichuan-provinco. La pitoreskejo areas 60 mil hektarojn kaj dividighas en 6 partojn, nome Changhai, Jianyan, Nuorilang, Shuzheng, Zharu kaj Heihai.

    Jiuzhaigou estas natura kaj primitiva pitoreskejo honorata kiel "paradizo en la homa mondo". La montoj en Jiuzhaigou altas 1980-3100 metrojn kaj estas kovritaj de richa kaj perfekta flauro el pinglofoliaj kaj larghfoliaj arboj kaj diversaj floroj. La loko havas tre diversajn aspektojn en la kvar sezonoj. En autuno la loko farighas multkolora pro la kontinuo da arbaroj en diversaj koloroj. La loko shuldas sian belecon al lagoj, fontoj, riveroj kaj malprofundajhoj. Laute au mallaute kantas akvofaloj de diversaj altecoj. La klaraj lagetoj grandaj kaj malgrandaj spegulas la enrigardantajn rughajn florojn, verdajn arbojn, neghajn montojn kaj lazuran chielon. Inter arboj fluas akvo kaj meze en la akvo elstaras arboj kaj floroj.

    Pitoreskejo Shuzheng areas 3 kvadratajn kilometrojn kaj estas miniaturo de la pejzagho de Jiuzhaigou. Pli ol 40 basenoj kontinuas 5 kilometrojn. La basenoj estas kristale klaraj. Pro malsameco de la profundecoj, sedimentoj kaj pejzaghoj che la bordo, chiuj basenoj havas sian propran karakteron.

    Pitoreskejo Nuorilang areas 3 kvadratajn kilometrojn. Tie la akvofalo larghas 320 metrojn kaj altas 20 metrojn. Ghi estas la plej largha akvofalo en Chinio kaj estas prenata kiel simbolo de Jiuzhaigou. Jinghai-lago estas kvieta kiel spegulo reflektante la enrigardantajn arbojn. Alia akvofalo Zhenzhutan larghas 310 metrojn kaj estas la plej forta akvofalo en Jiuzhaigou. Wuhua-lago havas kolorrichan fundon belan kiel pavo.

    En pitoreskejo Jianyan kun areo de 1 kvadrata kilometro estas Cigna Lago, Spada Montpinto, negha monto kaj primitiva arbaro. Estas shanco renkonti pandon. Zechawa-valo longas 17.8 kilometrojn, plej longa kaj plej profunda en Jiuzhaigou. Che la fino de la valo estas Changhai-lago kun longo de 8 kilometroj, plej granda lago en Jiuzhaigou. En vintro glacio sur la lago dikas 60 centimetrojn. La plej bela lago de Jiuzhaigou sin kashas profunde en densa arbaro, sed plej bela.

    En 1992 Jiuzhaigou estis enlistigita de Unesko kiel monda natura heredajho.