Krepuskiĝas kaj lumiĝas domo de paŝtisto Bi Ligong sur la stepo Dong Ujimqin, Xilin Gol, Interna Mongolio. Post tuttaga laboro Bi kaj liaj familianoj rigardas televidon, manĝante glaciaĵon. Ili sentas sin feliĉaj.

Pro vasta utiligo de vento kaj aliaj novaj resursoj en Interna Mongolio, paŝtistoj kaj kamparanoj en profunda stepo kaj malproksimaj regionoj eliras el montaro, dezerto kaj stepo, el fermiteco, per ekrano kaj elektro.

50-jara Bi kaj liaj familianoj loĝas sur herbejo kun areo de 9 mil muoj (15 muoj = 1 hektaro). Jam de la infaneco Bi loĝas sur la vasta herbejo. Li diris: "Antaŭe ni uzis kandelon, kaj poste kerosenan lampon. Por ŝpari fuelon, ni malofte lumigis la domon."

Bi klare memoras tiujn tagojn. "Ĉar tiam ni uzis kerosenan lampon, ellitiĝinte en la sekvanta mateno, mi trovis, ke mia nazo estis malpurigita de fumo." Li forte esperis, ke li povos uzi elektran lampon.

En la 80-aj jaroj de la pasinta jarcento Interna Mongolio disvolvis novajn resursojn por bonigi la vivon de paŝtistoj, kaj faris politikon, ke entrepreno de nove kreitaj produktaĵoj okupu malgrandan spacon ĉefe por vivo, kaj la produktaĵoj estis finance subtenataj de la ŝtato. En la hejmo de Bi funkciis vent-energia generatoro kun 50 vattoj, kiu laboras kiel helico sur aviadilo. La eta maŝino heligis la domon kaj koron de Bi.

Parolante pri la "malgranda elektrejo", Bi vigliĝis. "Ĝi ne nur kontentigis nian postulon pri lumigo, sed ankaŭ ebligis al ni rigardi televidon," Bi diris. Li ankaŭ ĉeestis kurson por lerni kiel funkciigi kaj ripari la aparaton. Poste li aĉetis koloran televidilon kaj lavmaŝinon, kaj la generatoro ne povis liveri sufiĉe da elektro al pluraj aparatoj, do iuj el ili fariĝis "ornamaĵoj". Funkciigi la aparatojn fariĝis lia sonĝo.

Bi memoras, ke en 1998 la familio ekuzis generatoron interkompletigantan ventan kaj sunan energiojn. La maŝino kontentigis ĉiujn liajn postulojn.

Por plibonigi la vivon de paŝtistoj, en 2003 la registaro instalis en la hejmo de Bi fotovoltan generatoran sistemon importitan el Hispanio. "Nun ĉio estas en ordo. Ni povas uzi pli da elektroaparatoj, ekzemple elektra marmito, fridujo kaj sonaparatoj." Neparolema Bi ĝojiĝis: "Bonege! Bonege! Nia vivo pli kaj pli interesiĝas. Ni povas vivi kiel urbanoj."

En 2005 en la hejmo de Bi instaliĝis interkompletiga vent-suna generatora sistemo kun mil vattoj. Li ekuzis komputilon, pri kiu li neniam pensis.

De vent-energia generatoro kun 50 vattoj al interkompletiga vent-suna generatora sistemo kun 360 vattoj, de fotovolta generatora sistemo kun 600 vattoj al interkompletiga vent-suna generatora sistemo kun mil vattoj, la "elektro" de Bi pli kaj pli akumuliĝis. Elektro donas infinitan forton al lia vivo.

Materialo:

En Ĉinio rapide disvolviĝas regeneraj resursoj. Laŭ la disvolva celo, en 2010 konvertitaj resursoj kiel akvo, vento, suno kaj bioresursoj rafinitaj per moderna teknologio egalos 270 milionojn da norma karbo kaj kontentigos postulon pri energio je 10%.

Jam kvar milionoj da malgrandaj vent-generatoroj instaliĝis en la hejmoj de paŝtistoj en Interna Mongolio, tamen pli ol 50 mil familioj ankoraŭ lumigas sian domon per olea lampo. Ilia problemo estos solvita ne longe poste per teknologio pri vent- aŭ fotovolta generatoro.

Ni tre ŝatus vian sugeston, klaku kaj donu vian voĉon!