La raporto de la 17-a Tutlanda Kongreso de KPĈ montras, ke oni prenos konstruadon de ekologia civilizacio kiel unu el la novaj postuloj por efektivigi la celon ĉiuflanke konstrui bonhavan socion. La raporto diras, ke oni devas meti konstruadon de resursoŝpara kaj bonmedia socio en elstaran lokon de disvolva strategio industria kaj moderna, kaj ĉiu institucio kaj ĉiu familio devas efektivigi tiun postulon.

Reprezentantoj Wang Youde kaj Niu Yuqin venis el malsamaj lokoj, tamen ili havas saman konon pri konstruado de ekologia civilizacio pro sia simila vivsperto.

“Ni bezonas ne nur riĉiĝon, sed ankaŭ verdiĝon,” diris Wang Youde el Lingwu de la Ningxia-a Huj-nacia Aŭtonoma Regiono en nordokcidenta Ĉinio. En la pasintaj 24 jaroj li gvidis la laboristojn de sia forstejo starigi en dezerto verdan ŝirmilon longan je 42 kilometroj oriente-okcidente kaj larĝan je 10 kilometroj sude-norde. La fiksa kapitalo de la forstejo multiĝis de 400 mil al 40.2 milionoj da juanoj, kaj la averaĝa jara enspezo de la laboristoj kreskis de 1200 al 12 mil juanoj.

Antaŭ la sukceso Wang Youde kaj liaj laboristoj ne heltis. Ili utiligis plejparton de la kolektiva kapitalo por daŭre bremsi dezerton. Wang diris: “Disvolo devas esti daŭrigebla. Se oni nur zorgas la nunajn interesojn, sablovento certe venos denove. Verdigo de sablejo bezonas senĉesan klopodon de kelkaj, dekkelkaj, eĉ kelkdekaj generacioj.”

58-jara Niu Yuqin estas kamparanino de Jingbian-gubernio en Shaanxi-provinco. Dum la pasintaj 23 jaroj ŝi gvidis lokajn kamparanojn superregi sablejon de 110 mil muoj (15 muoj = 1 hektaro).

Komence ŝi verdigis sablejon nur por sin liberigi el malriĉeco. En la printempo de 1984 ŝi laŭkontrakte ekkulturis arbojn en sablejo. Ŝi diris: “Tiam mi pensis, ke nur se ni povas iri el malriĉeco, ĉian malfacilan laboron ni ne timas.” Post ŝia klopodado la sablejo iom post iom verdiĝis, kaj ŝi iom post iom riĉiĝis.

“Se homoj ne superregus sablejon, ĝi superregus homojn” – jen penso de Niu Yuqin. Kiam ŝi havis kontantan monon, ŝi aĉetis arbidojn kaj fosis kanalon. Ĉi-jare ŝi fondis la Jingbian-an Sabloregan Kompanion por superregi sablejon kune kun lokaj kamparanoj.

La du reprezentantoj kredas, ke sub la gvidado de la alvoko konstrui ekologian civilizacion Ĉinio certe povos fariĝi bela ĝardeno, en kiu la homoj kaj naturo kunestos harmonie.

Ni tre ŝatus vian sugeston, klaku kaj donu vian voĉon!