Ankau APEK kun 21 membroj deziras variecon en la tutglobigho kaj apartecon en la komuneco kaj tial la neoficiala kunveno de gvidantoj de APEK farighis eksponejo de naciaj kostumoj. Fakte ili ne portis chiu sian propran nacian kostumon, sed tiun donacitan de la gastiganto, tial la gvidantoj, kiuj en la ordinaraj tagoj aspektas tre serioze, aperis kolektive antau la publiko en la loka nacia kostumo kaj farighis bela vidajho antau la fotilo de la jhurnalistoj kaj paroltemo de la ordinaraj popolanoj, char ilia libertempa aspekto estis malfacile vidata en la ordinaraj tagoj.

    Komence de septembro, kiam mi akompanis s-ron Osmo Buller, gheneralan direktoron de UEA, en Shanhajo, mi informighis de lokaj samideanoj, ke multaj lokanoj diskutis, kian chinan nacian kostumon la gvidantoj portos en la shanhaja kunveno de APEK. Chiuj estis certaj, ke ili portos chinstilajn vestojn, sed chu la vestoj estos faritaj el silkajhoj? Chu la fasono estos tiu de d-ro Sun Jatsen au china robo? Chu la tri virinoj, t.e. novzelanda chefministro, indonezia kaj filipina prezidantoj, portos chinan virinan robon? Chio chi siatempe estis enigmo, kio farighos gaja rememoro. Oni kun malpacienco atendis la inauguron.