Chinio, antikva kaj bela lando

Chinio kun historio de 5000 jaroj estas unu el la kvar plej antikvaj civilizitaj landoj de la mondo. Ghiaj 29 vidindajhoj, kiaj la Granda Muro, la Imperiestra Palaco de Pekino, la Terakotaj Militistoj kaj Chevaloj che la Mauzoleo de la Unua Imperiestro de Qin-dinastio, la Grotaroj de Mogao en Dunhuang, Potala-palaco de Tibeto, la antikva urbeto Lijiang kaj la klasikaj ghardenoj de Suzhou estis enlistigitaj de Unesko kiel mondaj kulturaj kaj naturaj heredajhoj. Pekino, Xi'an, Nankino, Luoyang, Kaifeng kaj Hangzhou kiel ses famaj antikvaj chefurboj de Chinio estas plej multe vizitataj de turistoj.

Chinio kun vasta teritorio havas multajn belajn montojn kaj riverojn, kaj ghiaj plej famaj vidindajhoj estas la Tri Gorghoj de Yangzi-rivero, pejzaghoj de Guilin, la Okcidenta Lago en Hangzhou k.a. La montoj Huangshan kaj Taishan havas ne nur belajn naturajn pejzaghojn sed ankau valorajn historiajn restajhojn. Chinio estas ankau unu el la landoj kun plej multaj specoj de sovaghaj bestoj. Ghia pando farighis marko por protekto de sovaghaj bestoj de la mondo.

Chinio nombras 55 nacimalplimultojn, preskau chiuj kun propra lingvo kaj vivmaniero. Iliaj vivregionoj kun belaj pejzaghoj kaj interesaj naciaj moroj altiras al si chiujare multajn en- kaj eksterlandajn turistojn. Por viziti tiujn lokojn oni lanchis novajn itinerojn, kiaj vojagho lau la antikva Silka Vojo, vizito al famaj budhismaj montoj, vojagho al Tibeto kaj vizito al Shangrila.

Vizitantoj al Chinio povas ne nur plezurigi sin per ghiaj naturaj belajhoj kaj percepti la charmon de ghia kulturo, sed ankau propraokule vidi ghian grandan shanghighon kaj sperti la vivon de ghia popolo. En la pasintaj pli ol 20 jaroj Chinio praktikis la politikon de reformado kaj pordomalfermo. Se vi duafoje venos al Chinio en 2004 por partopreni la 89-an UK, vi certe trovos la landon ege diferenca de tiu en 1986, kiam ghi gastigis la 71-an UK.

Pekino, antikva kaj vivoplena urbo

Pekino estas chefurbo de la China Popola Respubliko, kun 13 milionoj da loghantoj.

Pekino fondighis antau 3000 jaroj, kaj ghi ekzistas jam 800 jarojn kiel chefurbo. La longa historio postlasis al ghi multajn kulturajn restajhojn. La Imperiestra Palaco, la Granda Muro, la Somera Palaco, la Chiela Altaro kaj la Ruino de Restadejo de Pekin-homoj en Zhoukoudian estis enlistigitaj kiel mondaj kulturaj heredajhoj. Promenante en Pekino, vi ravighos de la imponaj konstruajhoj de la Imperiestra Palaco, kaj ankau de la chinstilaj loghdomoj de tiu orienta urbo.

Pekino estas ankau moderna metropolo. Preparado por gastigi la 29-ajn Olimpikojn de 2008 certe plirapidigos ghian pashon por internaciigho.

Pekino estas ankau bona loko por butikumado. Tie estas vendejoj de varoj de famaj markoj, grandaj chiovendejoj kaj malgrandaj elegantaj butikoj, kaj ankau bazaroj de kuriozaj antikvajhoj, kies prezoj estas treege malpli altaj ol en aliaj landoj.

Veninte al Chinio vi nepre devas ghui chinajn pladojn. Pekino estas ankau edeno de frandemuloj. Tie estas ne nur tradicia fama plado rostita pekina anaso, sed ankau bongustaj pladoj de aliaj lokoj de Chinio.

Kiam nokto falas, vi povas ghui chinan teon en tetrinkejo kaj pekinan operon en teatro. Jam de dekoj da jaroj babili en tetrinkejo kaj spekti pekinan operon estas chefa maniero de amuzigho de pekinaj loghantoj. Nun tetrinkejon kaj teatron de pekina teatro vizitas plejparte la maljuna generacio kaj alilandaj turistoj, sed bufedejon kaj dancejon preferas gejunuloj.

Kongresejo

La 89-a UK okazos en la Internacia Konferenca Centro de Pekino, kiu situas en la Vilagho de Azia Sportkunveno en la norda parto de Pekino, 9 kilometrojn norde de Tian'anmen-placo en la urbocentro, 20 kilometrojn okcidente de la Chefurba Flughaveno kaj 12 kilometrojn oriente de la Somera Palaco.

La Internacia Konferenca Centro de Pekino estas facile atingebla per diversaj trafikiloj, la medio kvieta kaj komforta. Ghi, moderne ekipita, kun hoteloj de diversaj kategorioj kaj amasloghejo, vendejoj kaj aliaj servejoj en la chirkauajho, estas tauga por diversaj grandaj kunvenoj kaj ekspozicioj.

Hoteloj

La regiono, en kiu situas la kongresejo, estis konstruita por gastigi la sportistojn dum la Azia Sportkunveno en 1990 kaj ghi vershajne servos ankau por la Olimpikoj en 2008. Tial abundas tie hoteloj kaj loghejoj de chiuj niveloj je vera promendistanco, fakte tute ne necesos busoj au aliaj trafikiloj, krom se vi preferos loghi en la urbocentro. Chirkau la kongresejo, samkiel en la centra regiono de Pekino, trovighas loghejoj de diversaj niveloj, chiuj kun tre allogaj prezoj kaj chiuj tre komfortaj.

Ekskursoj kaj flugoj

Se temas pri la ekskursoj, la kongresanoj havos nur unu problemon: kiun elekti. Krom pluraj allogaj vizitoj en Pekino mem kaj ghia chirkauajho, estos aranghitaj ankau multaj ravaj ekskursoj al famaj naturaj kaj historiaj vidindajhoj ekster Pekino. La flugon zorgos chefe la China Internacia Flugkompanio (AIR CHINA), kaj la turismon chefe la China Internacia Turisma Servo (CITS). Ambau ili pretas doni al la kongresanoj nealtprezan kaj bonkvalitan servadon.

Chinio multe shanghighis post la gastigo de la 71-a UK en 1986. Venu percepti ghian progreson kaj admiri refoje tiun chi antikvan kaj fascinan civilizon.