La china registaro chiam alte taksas Esperanton kaj subtenas la chinan E-movadon. Jam en 1939, prezidanto Mao Zedong surskribis por la Yan'an-a Esperanta Ekspozicio: "Mi dirus ankorau la samon: Se oni prenas Esperanton kiel formon por porti la ideon vere internaciisman kaj la ideon vere revolucian, do Esperanto povas esti lernata kaj devas esti lernata." La surskribo de Mao Zedong multe kuraghigis tiamajn chinajn esperantistojn. Ghi ludis kaj ludas gravan rolon por disvastigho de Esperanto en Chinio.

Post la fondigho de la nova Chinio en 1949, sub la gvido de Hujucz, pekinaj esperantistoj preparis sin por lanchi Esperantan revuon, starigi landan E-organizon. Dank' al la subteno de Hu Qiaomu, Guo Moruo kaj aliaj shtataj gvidantoj, en 1950 fondighis El Popola Chinio kaj en la sekvanta jaro China Esperanto-Ligo. Sekve de tio fondighis E-organizajhoj en diversaj lokoj de la lando.

En julio 1963 okazis en Pekino la Unua Tutlanda Esperanta Labor-kunsido. Vicchefministro Chen Yi chestis la kunsidon kaj faris varman paroladon. Li proponis okazigi UK en Pekino, kio forte kuraghigis la tutlandan esperantistaron. Post tiu kunsido la Alteduka Ministerio de Chinio instrukciis, ke altlernejoj instruu Esperanton kiel nedevigan lernobjekton. En 1982, la Eduka Ministerio de Chinio revalidigis la sciigon pri la instruo de Esperanto. Tio multege akcelis la instruadon kaj aplikadon de Esperanto en Chinio, ke pli ol 100 altlernejoj funkciigis E-kursojn.

En 1981, Chu Tunan, Hujucz, Bakin kaj aliaj 7 eminentuloj kune iniciatis la fondighon de la societo "Amikoj de Esperanto", al kiu alighis pli ol 160 politikistoj, sciencistoj, edukistoj, literaturistoj kaj aliaj personuloj. La unua prezidanto de la societo estis Chu Tunan, vicprezidanto de la Konstanta Komitato de la China Popola Kongreso (china parlamento), kaj la nuna prezidanto estas Chai Zemin, fama diplomato. En la pasintaj 20 jaroj la societo multe kontribuis al la china E-movado. Krome, pere de okazigo de la 71-a UK en Pekino kaj memorkunveno por la 130-a datreveno de la naskigho de d-ro Zamenhof, la movado gajnis subtenon de shtataj gvidantoj, kiaj Peng Zhen, Nie Rongzhen, Huang Hua, YaoYilin, kaj popolaj organizoj kiaj la China Popola Asocio por Amikeco kun Fremdaj Landoj, China Komitato de Unesko kaj la China Popola Instituto de Eksteraj Aferoj. Ankau la china jhurnalismo simpatias al E-movado.

En majo 2000, Li Peng, prezidanto de la Konstanta Komitato de la China Popola Kongreso surskribis por la 50-jarigho de El Popola Chinio: "Raportu Chinion, dissemu amikecon kaj bone eldonu El Popola Chinio."

La china registaro laudas la rolon de Esperanto en internaciaj intershanghoj kaj en defendo de la mondpaco, kaj pli eksplicite apogas la Esperantan movadon. Kiam ChEL prezentis petskribon por gastigi la 89-an UK en 2004, la registaro tuj sankciis tion. Komence de 2001, Liu Qi, urbestro de Pekino skribis oficialan leteron al la prezidanto de UEA por esprimi la subtenon al la gastigo. Chio chi tio montras, ke la china registaro alte atentas la disvolvighon de E-movado en Chinio en la nova jarcento.

La societo "Amikoj de Esperanto"
Adreso: P.O. Kesto 825, Beijing CN-100037, Chinio
Tel.: +86-10-68326682 Telefakso: +86-10-68326682

Rigardu fotojn