La nomitaj fajencajhoj estas kovritaj per dika tavolo da glazuro kun flava, verda kaj blanka koloroj. Tiaj fajencajhoj furoris en Tang-dinastio (618-907), tial oni nomas ilin trikoloraj fajencajhoj de Tang. La fajencajhoj havas formojn de vivoveraj chevaloj, kameloj kaj homoj, la proporcio de kies korpopartoj estas raciaj, la plastikaj linioj graciaj kaj la koloroj helfreshaj. La fajencajhoj plene montras altnivelan ceramikon kaj skulpturon de Tang-dinastio.

Tiaj fejencajhoj originis de unukoloraj fajencajhoj de Han-dinastio (206 a.K. -- 220 p.K.). La fajencajhoj de Han-dinastio plejparte estas glazuritaj flave au verde. En Tang-dinastio ili estis glazuritaj flave kaj verde, kaj tiel aperis fajencajhoj kun koloroj flava, verda kaj blanka, au flava, verda kaj blua. La tekniko en Tang-dinastio atingis altan nivelon en modlado, ornamado kaj glazurado.

La travidebla glazuro uzata por trikolora fajencajho estas farita el plumbo kaj kvarco. Se oni enmiksas en ghin iom da kupra oksido, ghi farighas verda post bakado; se oni enmiksas iom da fera oksido, ghi farighas flav-bruna post bakado. Ju pli da fero, des pli malhela farighas la flava koloro, ech rugh-bruna. Kobalta oksido estigas glazuron blua. Tia materialo estis malfacile akirebla tiutempe, tial raraj estas la fejencajhoj kun blua koloro de tiu periodo. Oni trovis nigre glazuritan chevalon en Anyang, Henan-provinco. La selo surhavas trikolorojn inkluzive de la rugha. Ghi estas vere rara artajho.

Menciinde estas, ke de la komenco ghis la meza periodo de la dinastio, en la unuigita Chinio prosperis produktado, komerco kaj trafiko. Chinaj kaj eksterlandaj komercistoj faris negocojn per la Silka Vojo, kaj Chang'an, chefurbo de la dinastio, farighis internacia urbego. Tial la trikoloraj fajencajhoj de la dinastio estas de ekzota arto figure kaj stile. La argilaj eksterlandaj homoj plejparte havas okulojn profunde enfalintajn kaj altan nazon kaj tenas bivon au alian muzikilon en la mano.

La arto de trikoloraj fajencajhoj atingis sian kulminon en la prospera periodo de Tang-dinastio. Kaj poste, ili dekadencis pro oftaj militoj, malpotencigho de la shtato, malfuroro de luksa sepultado kaj vasta uzado de porcelanajhoj. La trikoloraj fajencajhoj en Liao-dinastio (907-1125) estas krudaj forme kaj glazure. Tiuj en Song-dinastio (960-1279) estas stile delikataj, sed kolore monotonaj. Tiam la arto de farado de porcelanajhoj atingis altan nivelon kaj la farado de trikoloraj fajencajhoj estis neglektita. En la dinastioj Ming (1368-1644) kaj Qing (1644-1911) la flava kaj verda glazuroj estis vaste uzataj sur tegoloj. Tamen malofte vidighas trikoloraj fajencajhoj en tiu periodo.

Nun Chinio restarigis la produktadon de trikoloraj fajencajhoj en Luoyang.

Fotoj>>>