Klozoneo estas tradicia metiartajho produktata en Pekino. Ghi estas speco de emajlo, en kiu diversaj farboj estas entenataj en cheletoj, konsistantj el maldikaj lamenetoj vertikale velditaj sur la fono kaj kiu estas finfarita post bakado, polurado kaj orumado. La klozoneo distingighas per sia eleganteco kaj lukso.

Klozoneo nomighas ankau chel-emajlo. Ghia china nomo havas ian rilaton kun la regperiodo de imperiestro Jingtai (1450-1457) de Ming-dinastio. Kvankam ghi naskighis ne en tiu tempo, tamen tiam ghia arto atingis kulminon de sia disvolvigho.

En la Muzeo de la Imperiestra Palaco de Pekino kaj la muzeoj de Shenyang kaj Chengde konservighas multaj klozoneajhoj, el kiuj la plej antikvaj estis faritaj en 1426-1436. Plejparto de ili estas bronz-imitaj vinujoj kaj porcelan-imitaj vazoj, kiuj ghenerale funkciis kiel kultiloj en Imperiestra Palaco kaj temploj. La du-draka bovlo eksponata en la Muzeo de la Imperiestra Palaco estis farita inter 1426-1436, kiam regis imperiestro Xuande de Ming-dinastio. La ekstera surfaco de la bovlo estas ornamita per bildo de lotusfloroj kaj ghia parieto per tiu de du drakoj ludantaj globon. La bovlo elegante farita impresas impone kaj versimile.

En la regperiodo de imperiestro Jingtai la tekniko plue disvolvighis. Por praktika uzo oni produktis keston, florpoton, florvazon, pelvon, kandelabron kaj aliajn objektojn. Krome, oni faris ankau gigantan vinujon altan kiel homo kaj aliajn diversformajn objektojn altajn je unu metro. Sur ili vidighas diversaj ornamajhoj, kiaj krizantemoj, bananaj folioj, lotusfloroj, homfiguroj, bestoj, birdoj kaj fruktoj, kiuj multe beligas la klozoneajhojn.

En la regperiodo de imperiestro Jingtai aperis pluraj novaj glazuroj: kobalt-blua, lazura, safira, prusblua, sangrugha, amaranta, roza, bluverda, smeralda, verdeta, flava, blanka, purpura k.a. Tiaj glazuroj impresas kiel vakso. Precipe la blua glazuro imprsas safire, kies pureco kaj brileco estas nekompareblaj. La klozoneajhoj tiutempe faritaj plejparte estas kun blua farbo kiel la chefa, tial klozoneo nomighas ankau blua klozoneo. Tiam ankau la orumado estis altnivela. La klozoneajhoj faritaj en tiu tempo estas sobraj, modestaj, elegantaj kaj ore brilantaj ech hodiau.

La klozonea arto ne mallevighis en la posta periodo de Ming-dinastio. Tiam oni kreis iujn verkojn elspirantajn vilaghan guston, ekz. "kukurbo-kandelabro". La kandelabro konsistas el artefarita kukurbo granda kiel vera kukurbo kaj pluraj malgrandaj kukurboj kun folioj konvene aldonitaj, kiuj funkcias kiel kandelingoj. Ghi estas aparte bela kaj originala.

La klozonea arto impete disvolvighis en 1736-1796, kiam regis imperiestro Qianlong de Qing-dinastio. Dank' al la ekonomia prospero kaj granda disvolvigho de la metiaroj, senprecedence prosperis ankau la klozonea arto. La metiejoj pligrandighis. Ili faris klozoneajhojn pli brilaj, luksaj, subtilaj kaj praktikaj, kiuj iom post iom anstatauis jadajhojn kaj eburajhojn. Dank' al levigho de la arto oni elfaris miniaturan objekton kaj gigantan budhisman pagodon 3 metrojn altan. En farado de grandaj klozoneajhoj oni plibonigis la teknikon pretigi la fonon kaj lamenetojn. Dank' al apliko de la nova tekniko la klozonea fono farighis pli delikata kaj varia, kaj lamenetoj pli maldikaj ol tiuj en Ming-dinastio.

Klozoneajhoj estis valoraj metiartajhoj en la imperiestra palaco de Ming- kaj Qing-dinastioj. Ili estis farataj en specialaj metiejoj sub la kortego. En la lasta periodo de Qing-dinastio klozoneajhoj kiel komercajhoj vendighis en multaj lokoj en- kaj eksterlande, pro kio naskighis multaj popolaj metiejoj de klozoneajhoj. En la 30-aj jaroj de la 20-a jc. en Pekino funkciis pli ol 100 tiaj metiejoj kun 2 mil metiistoj. Poste pro militoj preskau pereis la klozonea arto.

La antikva klozonea arto denove ekprosperis en la lastaj 40 jaroj. Nun oni produktas ne nur tradiciajn klozoneajhojn, kiaj incensujoj, ding-oj (tripieda ujo), kruchoj kaj vazoj, sed ankau metiartajhojn, kiaj drako, fenikso, leono kaj aliaj bestoj, kaj malgrandajn vivbezonajhojn. Oni faras ankau figuron de antikva belulino kun klozonea korpo, skulptitaj eburaj vizagho kaj manoj, kio rompis la rutinon de la tradicia arto kaj donis novan vivforton al la antikva klozonea arto.

Fotoj>>>