La 55 nacimalplimultoj de Chinio havas richajn tradiciajn festojn. Ech unu nacimalplimulto kun malsamaj branchoj kaj en malsamaj regionoj havas malsamajn festojn, kaj ech unu sama festo portas malsamajn enhavojn. Tio ebligas al la festoj de la chinaj nacimalplimultoj havi tipajn lokajn karakterizajhojn kaj densajn naciecajn kolorojn.

La multnombraj karakterizaj festoj estas parto de la nacimalplimultaj moroj. Iuj festoj portas econ de primitiva totemo au religian koloron, sed plejparto de ili estas ligita kun kultura kaj sporta aktivadoj kaj varo-intershangho.

Nadam-festivalo estas tradicia festo de la mongoloj. Chiun autunon, kiam grasas la bovoj kaj shafoj, la feste vestitaj mongoloj kolektighas sur la Stepo de Interna Mongolio. En la festivalo estas ne nur sago-pafado, cheval-vetkuro kaj luktado, sed ankau atletiko, piedpilkado kaj prezentado de artaj programeroj. La vendobudoj en la chirkauajho tre viglas en intershangho de varoj.

La Novjara Tago lau la tibeta kalendaro estas la plej solena por la tibetanoj. Jam de la unuaj tagoj de la 12-a monato lau la tibeta kalendaro oni faras preparojn por ghi. Antauvespere de la Novjara Tago chiuj familianoj sidas chirkau tablo. Kun granda ghojo ili trinkas sekalvinon kaj buteran teon. En la Novjara Tago la loghantoj feste intersalutas kaj donacas silkan rubandon reciproke. Ili prezentas tibetajn teatrajhojn kaj la dancojn guo-ghuang kaj shjanzi. La tibetaj pashtistoj kantas kaj dancas che kampfajro ghis la sekvanta mateno.

Ankau la Rikolta Festo kaj Ban-festo en autuno estas tradiciaj por la tibetanoj. Kaj membroj de la tibeta nacio en aliaj lokoj havas siajn proprajn festojn. Ekz., tiuj en parto de Jone-gubernio, Gansu-provinco, festas Manla-feston, kiu dauras de la 8-a ghis la 15-a de la unua monato lau la china luna kalendaro, kaj en la festotago la edzinighintaj virinoj revenas al sia gepatra hejmo por kune festi kaj distrighi per kantoj kaj dancoj; tiuj en Gannan, Gansu-provinco, festas sian Shjanglang-feston sur stepo kaj en arbaro de la 4-a ghis la 17-a de la sesa monato lau la china luna kalendaro, kaj en la festo ili starigas tendojn kaj buchas bovojn kaj shafojn; kaj tiuj en Wenxian-gubernio, Gansu-provinco, festas en la bela kvina monato lau la china luna kalendaro la Flor-plukan Feston, kiu nomighas ankau Filina Festo.

Che la mjau-oj estas la Drakboata Festo kaj la festoj Lusheng, Chishin, Tjaupo, Huashan k.a. El ili iuj estas komunaj al la mjau-oj, aliaj apartenas al tiu au alia brancho el ili kaj triaj al kelkaj vilaghetoj sur monto. Estas interese, ke tiuj festoj ghenerale rilatas al kortushaj rakontoj, kiuj aldonis al ili ian legendan koloron.

La mjau-oj havas sian propran tradician Novjaran Feston por festi richan rikolton, preghi por favoraj vento kaj pluvo kaj esperi abundecon de grenoj kaj brutoj. La festo dauras tri tagojn, en kiuj la mjau-oj dancas kun lusheng-oj (blovinstrumentoj), ludas flutojn kaj aranghas taurbatalon kaj cheval-vetkuron. La 8-a de la kvara monato lau la china luna kalendaro estas alia festo de la mjau-oj. En tiu tago la mjau-oj en la chirkauajho de Guiyang, chefurbo de Guizhou-provinco, venas al Fontano en la urbocentro por honori la memoron al sianaciaj herooj en la historio. Tiutage chiuj familioj trinkas rizvinon kaj manghas kolorigitan gluecan rizajhon karmemore al sianaciaj herooj.

Ankau al la dong-oj ne mankas festoj, el kiuj la plej altira estas la Festo de Taurbatalo. Chiu dong-a vilagho bredas unu fortan lukteman tauron. En la festotago la taurbatalejo ornamita per koloraj flagoj estas plenplena de rigardantoj. Oni tamtamas, gongas kaj ludas lusheng-ojn. Chies atenton kaptas la tauroj el la diversaj vilaghoj, kovritaj per rugha sateno sur la kapo kaj portantaj buntan pagodon kun flago kaj fazanvosto sur la dorso kaj arghentajn sonoriletojn sur la kolo. Ili obstine batalas kaj sentigas al la rigardantoj strechan kaj gajan etoson.

La Torcha Festo estas tradicie festata de la ji-oj, baj-oj, va-oj, lahu-oj, achang-oj, lisu-oj kaj hani-oj, kiuj vivas en sudokcidenta Chinio. La festo okazas en la 24-a kaj la 25-a de junio lau la china luna kalendaro. Nokte de la festotago, en chiuj vilaghoj staras altaj torchaj iluminajhoj. Kun malgrandaj rezinaj torchoj festantoj marshas sur kamp-vojoj, de vilagho al vilagho. Al ili alighas pli kaj pli da homoj, kaj la vicaro farighas kvazau fajra drako. Junuloj aldonas al la fajro rezinon kaj pulvon kaj petolas de tempo al tempo. En iuj lokoj oni okazigas foiron samtempe por faciligi al la loghantoj intershanghon de varoj kaj tiel vigligi la urban kaj vilaghan ekonomion.

La taj-oj havas multajn aktivadojn en sia Novjara Tago. Ili kantas kaj dancas por montri sian ghojon, amasigas sablon por preghi pri richa rikolto, jhetas saketon por peti amon, vershas akvon por esprimi bondezirojn kaj krome ankau okazigas drakboatan konkurson. El ili la reciproka akvovershado estas la plej spektakloricha, kaj oni nomas ghin Akvoversha Festo.

Krome, estas tradiciaj ankau la Marta Foiro kaj Jhaushanlin de la baj-oj, Danu-festo de la jau-oj, la Kantado en la Tria de Marto de la ghuang-oj kaj li-oj, Bov-festo de la tughja-oj, Duan-festo de la shuj-oj, Njan-festo de la loba-oj, Bangbang-festivalo de la nashi-oj, Daugan-festo de la lisu-oj kaj Munau-festivalo de la ghingpo-oj. Kaj la huj-oj, ujguroj kaj aliaj ok nacimalplimultoj kredantaj je islamo havas la Fasto-rompan Feston, Korban-feston kaj aliajn religiajn festojn.