Bona alkoholajho estas ghuo por homoj. En Chinio trovighas diverspecaj alkoholajhoj. Kutime en geedzigha, naskightaga kaj aliaj festoj oni sin regalas per bona alkoholajho por celebrado.

Antau longe chinoj jam posedis teknikon de vinfarado. Inter la grandnombraj elterigitaj historiaj objektoj trovighas ne nur multaj vinujoj kaj vazetoj por drinkado, sed ankau antikva alkoholajho konservata ghis nun. Ekzemple, antau kelkaj jaroj oni elfosis du kruchojn da alkoholajho produktita antau 2 280 jaroj, el antikva tombo en Pingshan-gubernio, Hubei-provinco. Unu el ili entenis smeraldan kaj diafanan alkoholajhon kaj la alia malhelverdan. La elfositaj kruchoj estis bone hermetikigitaj. Kiam ili estis malfermitaj, tuj tiklas la nazon aroma odoro el ili. Lau analizo de sciencistoj, la alkoholajho estis fermentigita per gisto. Ghia eltrovo prezentis valoran materialon por esplori teknologion pri alkoholajhofarado en Chinio.

En Chinio estas miloj da specoj de biero, rizvino, vino, ratafio, brando k.a. En la Unua Alkoholajhogustuma Kunveno en 1952 Moutai-brando de Guizhou, Tequ-brando de Luzhou de Sichuan-provinco, Fen-brando de Xinghua-vilagho de Shanxi-provinco, Xifeng-brando de Fengxiang de Shaanxi-provinco, Jafan-rizvino de Shaoxing de Zhejiang-provinco, la Ormedala Brando, Tonika Vermuto kaj Rugha Vino de Yantai de Shandong-provinco estis elektitaj kiel ok superaj alkoholajhoj de Chinio. En la lastaj jaroj estis elektitaj 18 specoj de landfamaj alkoholajhoj kaj 47 specoj de bonkvalitaj alkoholajhoj.

Moutai-brando produktita en Maotai-urbeto de Guizhou-provinco

China brando kun forta alkoholo estas distilita el fermentinta amelhava greno. Ghia aromo estas dividita chefe en kvin tipojn: delikata aromo kun Fen-brando kiel la tipa, densa aromo kun Tequ-brando kaj la Kvingrena Brando de Sichuan kiel la tipaj, originala aromo kun Moutai de Guizhou kiel la tipa, rizaromo kun Sanhua-brando de Guangxi kiel la tipa.

Moutai-brando produktighas en Maotai-urbeto de Renhuai-gubernio, Guizhou-provinco. Antikve la urbeto estis izolita kaj malofte vizitata. En 1745 tie komencis trafiki shipoj, la urbeto farighis grava havenurbo che Chishui-rivero. La dokistoj bezonis alkoholajhon por sin plezurigi. Tiel alkoholajho-farado multe progresis kaj iom post iom oni perfektigis sian teknologion kaj produktis superan nektaron. Moutai-brando ne nur okupas la unuan lokon inter la chinaj famaj alkoholajhoj, sed ankau estas honorita kiel unu el la tri mondfamaj brandoj, la aliaj du estas konjaka brando kaj skota viskio.

Oni shuldas la bonan kvaliton de Moutai-brando al ghiaj bonkvalitaj materialoj kaj la tradicia fermenta teknologio. Ghi estas preparita el lokaj bonkvalitaj sorgo kaj tritiko. Ghia farado karakterizighas per plurfoja fermentado, plurfoja elpreno de alkoholajho, longtempa konservado kaj zorgema aldono de ingrediencoj. Oni okfoje fermentigadas grenon kaj okfoje elprenadas alkoholajhon. La tuta fermenta procezo dauras dek monatojn. Oni devas meti la malbonkvalitan alkoholajhojn en kelon por fermentigi ghin refoje. La fermentinta alkoholajho devas konservighi tri jarojn. Poste brandfaraj majstroj zorgeme miksas alkoholajhojn konservitajn 5-, 10-, 20-jare, kaj tiel formighas Moutai-brando pure klara, milda kaj delikate aroma. Tiu brando entenas ne tre multan alkoholon, sed estas forta. Tamen ghi estas ne kapturna, nek pika.

La rizvino estas farita el glueca rizo, rizo kaj milio, kun aldono de speciala gisto, post glukozigho, fermentado kaj distilado. La plej bona el la rizvinoj estas Shaoxing-rizvino. Estas multe da specoj de la vizvinoj. La chefaj estas Huadiao-rizvino, Jafan-rizvino, Shanniang-rizvino kaj Xiangxue-rizvino. Jafan-rizvino estas fermentinta el rizo kun aldono de glueca rizo. Ghi estas dolcha kaj apetiveka. Shanniang-rizvino estas gustoforta kaj fermentinta el rizo kaj alkoholajho. Xiangxue-rizvino estas preparita el fecho de Jafan kaj rizo. Huadiao havas interesan historion. Legendo diras, ke en antikva Shaoxing, jhus naskinte filinon, la gepatroj devis acheti du vazojn da rizvino, fari artan reliefon sur la vazoj, kaj poste konservi ilin en kelo. Oni elprenis la rizvinon je edzinigho de la filino, portis ghin al la bofila familio. Regali gastojn per ghi simbolas felichon. Tial la rizvino ricevis alian nomon Filina Rizvino.

Biero produktita de la Qingdao-a Bierfabriko de Shandong-provinco

La plej bonkvalita el la chinaj bieroj estas tiu de la Qingdao-a Bierfabriko de Shandong-provinco. Ghi estas farita el bonkvalita materialo -- minerala akvo de Laoshan-monto en la antauurbo de Qingdao, per originala fermenta teknologio. Ghi estas diafane orflava, gustoplena, dolcha kaj refreshiga, kun suficha karbona dioksido kaj delikataj shaumoj.

Duondolcha Blanka Vino kun marko Dinastio de la China-Franca Vinfara Limigita Kompanio de Tianjin

Seka Blanka Vino kun marko Granda Muro de la Shacheng-a Vinfara Kompanio de Hebei-provinco

Vino kaj ratafio estas preparitaj el freshaj fruktoj, per fermentado kaj distilado. Vino, kun bela koloro, entenas diversajn vitaminojn, mineralojn kaj sukeron kaj okupas gravan lokon el la chinaj ratafioj. El multaj chinaj vinoj la plej bonkvalitaj estas Tonika Vermuto, Blanka Vino, Ormedala Brando produktitaj de Shandong-provinco, la China Rugha Vino kaj Speciala Brando de Pekino, Seka Blanka Vino kun marko Granda Muro de la Shacheng-a Vinfara Kompanio de Hebei, kaj la Duondolcha Blanka Vino kun marko Dinastio de la China-Franca Vinfara Limigita Kompanio de Tianjin. Krome Chinio produktas ankau multajn aliajn ratafiojn, kiaj pomvino de Liaoning, mandarinvino de Sichuan, arbutvino de Jiangxi, lichivino de Fujian, ananasvino de Guangxi, oranghvino de Zhejiang kaj pirvino de Hebei, kaj vinoj fermentintaj el fragoj, kratag-fruktoj kaj aktinidioj (Actinidia chinensis), chiuj kun sia distingajho konservas originalan guston kaj ebriigan aromon.

Fen-brando produktita en Shanxi-provinco

Kunmiksitaj alkoholajhoj, inkluzive fruktsukan vinon kaj eliksiron, estas preparitaj proporcie el alkoholajho au manghebla alkoholo kun aldonitaj sukero, aromajho, manghebla pigmento au drogoj. Bambufolie Verda Brando produktita de la Xinghua-vilagha Fen-branda Fabriko de Fenyang-gubernio, Shanxi-provinco, estas tipo de la kunmiksitaj alkoholajhoj. Tiu vino kun longa historio estas bambufolia maceritajho. Ghi estas preparita el Fen-brand, kun aldonitaj angeliko, amomo, santalo, suzigio (Suzygium aromaticum), auklandio (Aucklandia lappa), bambufolioj kaj aliaj drogoj kun aldono de kando. Ghi superas aliajn samspecialajn kunmiksitajn alkoholajhojn kaj havas naturan koloron, aromon kaj guston de la maceritaj drogoj. Ghi povas vigligi sangon kaj energion, forigi mukajhon kaj sanigi la hepaton.

En Chinio cirkulas legendo pri "vinfarado de simioj". En pratempo simioj sin vivtenis per sovaghaj fruktoj, kiuj abundis chie en arbaro. La fruktoj maturighis en en chiuj sezonoj, tial ili devis konservi tiajn fruktojn en kaverno. Post longa tempo ili putrighis, la shimintaj fruktosheloj nature fermentigis la fruktojn, kiuj iom post iom formighis en nektaron aromoplenan. Tiu "simi-vino" fakte estis nature formighinta sovaghfrukta vino. Nun ankau la sovaghfrukta vino estas populara en Chinio pro senpolucieco kaj aparta gusto. Iu vinfabriko en arbara regiono de la Granda Xing'an-montaro produktis pli ol 30 specojn da vino el dekkelkaj specoj de sovagha plantoj, kiaj rughfaba vino, vakcinifrukta vino, eglanteria vino, krizantema vino k.a. En 1985 la speciala rughfaba vino gajnis arghentan medalon de bonkvalita manghajho de Chinio.

Modere trinki vinon, precipe tiun kun malmulta alkoholo, vigligas cirkuladon de sango kaj veki apetiton. Longtempa ekscesa drinkado povas damaghi la hepaton kaj nervajn sistemojn kaj kauzi alkoholismon.