Tri Grandaj Ebenajhoj

La ebenajhoj de Chinio okupas ch. 1 000 000 kvadratajn kilometrojn, konsistigante ch. dekonon de la totala teritorio de Chinio. La tri plej grandaj el la ebenajhoj estas la Nordorienta Ebenajho, Nord-Chinia Ebenajho kaj Ebenajho de la Meza kaj Malsupra Yangzi-rivero. Chiu el ili areas ch. 300 000 kvadratajn kilometrojn. Ili kushas en la orienta parto de Chinio kaj interligighas unu kun alia de nordo al sudo.

La Nordorienta Ebenajho kushas en nordorienta Chinio. Ghia norda parto estas el aluvioj de la rivero Songhua kaj ghia brancho Nenjiang, dum ghia suda parto estas el aluvioj de Liaohe, tial oni ankau nomas ghin Songhua-Liaohe-a Ebenajho. Krome, ankau Sanjiang-ebenajho che la kunfluejo de la riveroj Songhua, Wusuli kaj Heilong estas ghia parto.

La Nordorienta Ebenajho ghenerale estas malpli alta ol 200 metrojn super la marnivelo. Ghia pli alta meza parto servas kiel akvodislimo inter la riveroj Liaohe kaj Songhua. Okcidente kaj norde de la ebenajho estas montaroj la Granda kaj Malgranda Xing'an kaj oriente Changbai.

Tiu regiono apartenas al la humida kaj duonhumida mezvarma zono. Ghia fekunda tero utilas al agrikulturo. Ghi produktas multe da sojfabo, sorgo, tritiko, sukerbeto kaj lino. Antaue Sanjiang-ebenajho estis dezerta, tial oni nomis la lokon "Norda Sovaghejo". Post fondigho de la China Popola Respubliko, tie funkciighis multe da grandaj shtataj farmejoj, laborantoj de kiuj ekspluatis 1 400 000 hektarojn da virga tero, akiris richajn rikoltojn kaj faris la lokon "Norda Grenejo". La Nordorienta Ebenajho estas ankau grava industria bazloko de Chinio kun prospera fervoja trafiko.

La Nord-Chinia Ebenajho en la malsupra baseno de la Flava Rivero etendighas okcidente ghis Taihang-montaro kaj la montregiono en la okcidenta Henan-provinco, oriente ghis Bohai-maro, la Flava Maro kaj la montetaro en Shandong-provinco, norde ghis Yanshan-montaro, sudokcidente ghis Tongbai-montaro kaj Dabie-montaro, sudoriente ghis la nordaj partoj de provincoj Jiangsu kaj Anhui kaj kuntushighas kun la Ebenajho de la Meza kaj Malsupra Yangzi-rivero. Tiu chi ebenajho estas formita el aluvioj de la Flava Rivero, Huaihe kaj Haihe kaj plejparte altas malpli ol 50 metrojn super la marnivelo. La malsupra parto de la Flava Rivero dislimis la ebenajhon en du partojn: la suda parto estas nomata Huanghuai-ebenajho (Ebenajho de la Flava Rivero kaj Huaihe-rivero), dum la norda -- Haihe-ebenajho (Ebenajho de la Flava Rivero kaj Haihe-rivero), kie lokighas Pekino kaj Tianjin.

Kiam la Flava Rivero eniras la Nord-Chinian Ebenajhon, ghia fluo tuj malrapidighas kaj sedimenighas sablo alportita de la altebenajho. Tial la fluejo altighas jaron post jaro kaj ankau la digoj de la rivero altighas jaron post jaro. Sekve aperis "rivero super la tero". En la historio tie estis regiono de katastrofaj inundoj, Haihe-akvosistemo havas multajn branchojn en sia supra baseno, ili kunfluighas che la urbo Tianjin kaj enfluas en maron. En la pluva sezono la rivero tute ne povis pasigi tra si superakvon venintan de ghiaj branchoj. Tial la malsupra baseno de Haihe ofte suferis de inundo. Ankau Huaihe-rivero facile inundis pro manko de fluejo en la malsupra parto, char iam en ghin entrudighis la akvo de la Flava Rivero, kiu alportis grandnombron da sableroj kaj shtopis la fluejon. En la lastaj 40 jaroj, oni faris grandskalan sintezan konstruadon al la Flava Rivero, Huaihe kaj Haihe, venkis multajn diluvojn dum multaj jaroj, garantiis kaj la disvolvighon de la agrikultura produktado kaj la sekurecon de la loghantoj.

En la Nord-Chinia Ebenajho trovighas fekundaj aluvioj kaj multas pluvoj, kio donas tre favorajn kondichojn por la agrokulturo. La ebenajho estas unu el la gravaj agrikulturaj regionoj de nia lando.

La ebenajho de la Meza kaj Malsupra Yangzi-rivero etendighas ambauflanke de la meza kaj malsupra Yangzi-rivero per serio da ebenajhoj en diferencaj vastecoj. De okcidento al oriento estas Lianghu-ebenajho, Poyang-ebenajho, Ebenajho de Meza Anhui-provinco kaj la delto de Yangzi-rivero, kiuj ekskluzive estas aluvioj de Yangzi-rivero kaj ghiaj branchoj kaj plejparto el ili estas malpli alta ol 50 metrojn super la marnivelo. Kaj ili konsistigas la Ebenajhon de la Meza kaj Malsupra Yangzi-rivero. Norde kaj sude de la ebenajho etedighas montaroj grandaj kaj malgrandaj.

Tie dense interkrucighas riveroj kaj punktighas lagoj, kiuj utilas ne nur al irigaciado kaj surakva transportado, sed ankau al kresko de fishoj, salikokoj, lotuso, trapo kaj fragmito. La ebenajho abundas je rizo, tritiko, kolzo, kotono, silko k.a. Ghi estas grava agrikultura regiono de Chinio, kun titolo "Lando de Fishoj kaj Rizo".