La 91-a
Universala Kongreso de Esperanto en la itala urbo Florenco (29 julio-5
aŭgusto) ĝuos la patronadon de la plej alta reprezentanto de la
gastiganta lando, s-ro Giorgio Napolitano, prezidanto de la Itala
Respubliko. La oficejo de la Respublika Prezidanteco konfirmis tiun
honorigon de la ĉi-jara UK la 7-an de julio.
S-ro Napolitano ekoficis
kiel la 11-a prezidanto de la Itala Respubliko la 15-an de majo
ĉi-jare. Li plenumas elstaran rolon en la itala politika vivo jam
de pli ol duona jarcento. Kiel parlamenta deputito li estis unuafoje
elektita en la jaro 1953. De 1989 ĝis 1992 li estis membro de la
Eŭropa Parlamento kaj de 1992 ĝis 1994 prezidanto de la Itala Ĉambro
de Deputitoj. Kiel ministro pri internaj aferoj li oficis de 1996
ĝis 1998. De 1999 ĝis 2004 li prezidis la Komisionon pri Konstituciaj
Aferoj de la Eŭropa Parlamento. En septembro 2005 li estis instalita
kiel dumviva senatano.
Ĝis la 10-a de julio
al la UK en Florenco aliĝis 2111 kongresanoj el 62 landoj.
(el “Gazetaraj Komunikoj
de UEA”)
|