Unu el la plej konataj rusaj bandoj, Akvarium, nun havas retejon en Esperanto. Krom Esperanto, la oficiala multlingva retejo de Akvarium estas legebla en la rusa, angla, germana, franca kaj finna lingvoj. Tradukoj al pliaj lingvoj estas planataj. La nove lanĉita retejo ankoraŭ ne havas ege multajn vizitojn, kaj la vizitoj al la anglalingva sekcio estas nur duoble pli multaj ol al la esperantlingva. "Mi aŭskultas kantojn Akvarium ekde adoleskanteco, kaj kompreneble mi multe interesiĝas pri ĝia interret-aktivado", rakontas Grigorij Arosev, kiu nun respondecas pri la esperantlingva versio de la oficiala multlingva retejo de la bando. Speciale por Libera Folio Grigorij Arosev tradukis unu el la popularaj kantoj de Akvarium. Multaj kantoj de la bando estas libere elŝuteblaj. "Libere fordonante nian muzikon, ni mem akiras pli da libereco", diras la kreinto de Akvarium, Boris Grebenŝĉikov.