La 13-an de aprilo 2007 en Rusia Akademio pri Klerigo (Moskvo, Rusio) okazis unika internacia konferenco "Propedeŭtika rolo de Esperanto en lernado de fremdaj lingvoj".

La aranĝo estis iniciatita de Rusia Ministerio pri Klerigo kaj Scienco post la letero de Eŭropa Jurscienca Universitato "Justo" kiu enhavis proponon enkonduki Esperanton en studplanojn de rusiaj klerigejoj.

Pluraj alparolantoj raportis pri esploroj, pruvintaj la propedeŭtikajn valorojn de Esperanto. Inter aliaj ekz. profesoro de la Nagoja Universitato Morita Akira surbaze de siaj 40-jaraj spertoj emfazis, ke anticipa studado de Esperanto efektive kaj reale helpas la japanajn studentojn en la posta lernado de fremdaj lingvoj.

Reprezentanto de la Ministerio Nelli Mihajlivna Rozina rakontis, ke ne ekzistas grandaj resursoj por financi diversajn projektojn kaj eksperimentojn. Krome, ŝi opiniis, ke en Rusio ĝis nun ne estis faritaj signifaj kaj rekonitaj eksperimentoj, pruvantaj la propedeŭtikajn valorojn de Esperanto por lernado de fremdaj lingvoj.

En fino de la konferenco la ĉeestantoj akceptis rezolucion (la celo ja estis ĝuste tio), kiu baldaŭ estos sendita al la decidpova Ministerio pri Klerigo kaj Scienco.

Detala raporto pri la konferenco troveblas ĉe: <http://planedo.ru/sobytia/konf>

(E-rus-info)