La 17-18-an de majo okazis en la urbo Harbin, norda Ĉinio la Kvina Esperanta Kongreso de Nordorienta Ĉinio kun la temo “Esperanto por konstruado de harmonia socio”. Ĝin partoprenis pli ol 130 esperantistoj el provincoj Heilongjiang, Jilin, Liaoning, Aŭtonoma Regiono de Interna Mongolio, kaj aliaj 20 provincoj kaj urboj de Ĉinio, kaj ankaŭ el Rusio, Koreio kaj Kanado.

Matene de la 17-a malfermiĝis la kongreso en la halo de la Scienca kaj Teknologia Instituto de Heilongjiang.

Dum la kongreso okazis prelegoj pri azia Esperanto-movado, tajĝiĉuan, familio de Zamenhof, redakto de Esperanto-lernolibro laŭ postulo de nova tempo, Esperanto-instruado, paroliga kurso de Esperanto kaj aliaj. Tian Chengkun, esperantisto el Heilongjiang-provinco, ekspoziciis papereltondaĵojn pri profiloj de famaj esperantistoj.

La Ĉina Esperanto-Ligo iniciatis mondonacon al la plagitoj en Sichuan-a tertremo. 11981 juanoj kaj 1600 rubloj donacitaj de la partoprenantoj, inkluzive de esperantistoj de Rusio kaj Koreio, jam estis transsendita al la Ministerio de Civilaj Aferoj de Ĉinio.

La kongreso decidis, ke la Sesa Esperanta Kongreso de Nordorienta Ĉinio okazos en aŭgusto 2010 en la urbo Dandong, Liaoning-provinco.