El Popola Chinio

Zhuxianzhen-a ksilografiaĵo por novjaro kun longa historio estas prapatro de la ĉinaj ksilografiaĵoj por novjaro kaj estis nomita brila perlo en la ĉina popolarta trezorejo. En 2006 ĝi estis enskribita en la liston de la unuaj ŝtatnivelaj nemateriaj kulturaj heredaĵoj de Ĉinio.

En Norda Song-dinastio (960-1127), antaǔ la Printempa Festo en la ĉefurbo Bianliang (nuna Kaifeng de Henan-provinco) ĉiuj familioj gluis bildojn de domdioj por preĝi pri longa vivo de la familianoj, riĉeco kaj riĉaj rikoltoj, kaj fortimigi malbonajn spiritojn. Post dekadenco kaj pereo de la dinastio Norda Song kaj militoj en Kaifeng la ksilografiaĵoj malprosperiĝis.

En Ming-dinastio (1368-1644) la ksilografiaĵoj reprosperiĝis en la urbeto Zhuxianzhen proksima al Kaifeng. En la fino de Ming-dinastio Kaifeng estis inundita kaj Zhuxianzhen fariĝis centro de la ksilografiaĵoj. Kaj de tiam la ksilografiaĵoj de Kaifeng kaj Zhuxianzhen kune estis nomataj "zhuxianzhen-aj ksilografiaĵoj".

Zhuxianzhen-aj ksilografiaĵoj por novjaro havas kvin karakterizaĵojn: rustikaj linioj kun alterno de dikaj kaj maldikaj linioj, troigita figuro kun granda kapo kaj malgranda korpo, plena komponaĵo simetria maldekstre kaj dekstre, brilaj koloroj kun forta kontrasto, kaj seriozeco kaj dignopleno de homfiguro. Ili temas pri kuirejdio, ĉiel- kaj terdioj, kaj domdioj tre ŝatataj kaj adorataj de la popolanoj.

Ĉina literaturisto Lusin tre ŝatis zhuxianzhen-ajn ksilografiaĵojn kaj komentis: "Zhuxianzhen-aj ksilografiaĵoj estas tre bonaj. Ili kun dikaj strekoj estas diferencaj de alilokaj ksilografiaĵoj delikate kaj elegante ornamitaj. Zhuxianzhen-aj ksilografiaĵoj estas simplaj kaj nebeligitaj. Ili kun nekoketaj figuroj, brilaj koloroj kaj lokaj gustoj havas apartan trajton de la novjaraj ksilografiaĵoj en norda Ĉinio."