La 21-an de Julio inaŭguriĝis la 45-a Konferenco de Internacia Ligo de Esperantistaj Instruistoj en Kunming, Yunnan-provinco de la sudokcidenta parto de Ĉinio. Pli ol cent delegitoj el 17 landoj ĉeestis.

    La konferenca temo "La arto de komunikado, komunikado de artoj" esprimis tion, ke lingvoj de scienca komunikado kaj edukado estis la kerna temo de la diskutoj dum la 45-a konferenco de ILEI. La artoj kun siaj universalaj pedagogiaj valoroj, specifaj esprimrimedoj kaj aparta kapablo de komunikado trans la lingvaj kaj kulturaj limoj nature aldoniĝas al tiu interesdirekto. La Kunming-a Artkolegio disponigas la ĝustan medion por konferenci pri la graveco de artoj por edukado al la kulturo de paco, al estimo de la homo kaj al respekto de la naturo.

    La provinco Yunnan situas ĉe landlimo de sudokcidenta Ĉinio kaj ĝi havas vastan teritorion, grandiozan montaron kaj riveraron kaj abundan naciecan kulturan riĉfonton de 25 naciminoritatoj. En la provinco loĝas plej multaj naciminoritatoj. Diversaj naciecoj tenas sian naciecan tradicion en disvolviĝo, inkluzive de kanto, danco, moro kaj kutimo, popolaj loĝejoj kaj aliaj.

(el ilei.info)

Redaktoro: Xie Ruifeng