lh

"Se oni 1.3-miliardobligos ajnan malgrandan aferon, oni ricevos grandegan aferon. Se oni dividos tre grandan kvanton per 1.3 miliardoj, oni rivevos malgrandegan kvanton," china chefministro Wen Jiabao tiel esprimis sian senton. La chefministro de lando kun plej granda loghantaro unuafoje montris tiun operacion de obligado kaj divido kaj simplan kaj komplikan, kiam li estis intervjuata de la usona jhurnalo Vashington-a Poshto novembre de 2003 en Pekino. Post tio en sia vizito al Usono li ripetis tiun operacion en Harvard-Universitato. La china chefministro sobre kalkulis, dum la tuta mondo admiris la ekonomiajn miraklojn de Chinio. En la pasintaj 25 jaroj la china ekonomio kreskis chiujare je 8%. Malgrau damagho pro SARS, la totala enlanda produktovaloro de 2003 kreskis je 9.1%.

"La operacio de obligado kaj divido de la chefministro, tre facile komprenata, montras, ke la nova registaro bone scias la kondichojn de sia lando," diris Li Shantong, membro de la Tutlanda Komitato de la China Popola Politika Interkonsiligha Konferenco kaj esploristino de la Disvolv-Esplora Centro sub la Shtata Konsilantaro. Shi eksplikis, ke kvankam en 2003 la totala enlanda produktovaloro de Chinio atingis 1400 miliardojn da usonaj dolaroj kaj per tio Chinio okupis la sesan lokon en la mondo, tamen se ghi dividighas per 1.3 miliardoj, do la pokapa produktovaloro estis nur iom pli ol mil usonaj dolaroj kaj okupis la 130-an lokon en la mondo. Wang Tongsan, profesoro de la China Akademio de Sociaj Sciencoj, opiniis, ke dank' al rapida kresko en la pasintaj 20 jaroj Chinio jam eniris en shlosilan periodon de disvolvigho kaj aperis multe da problemoj, kiuj eble malhelpos la ekonomian disvolvighon en la estonteco. Unu el tiuj problemoj estas ke la rapida kresko de la ekonomio sin bazas sur troa konsumado kaj malshparo de richfontoj ofte koste de damagho de la medio. Li diris, ke Chinio ne povas elporti tian kreskon en la longa estonteco kaj tion ne povas elporti ankau la tuta mondo.

Sociologo diris, ke la rapida ekonomia kresko de Chinio devas porti pli da utilo al la homoj, sed la malekvilibro de la regiona disvolvigho kaj socia enspezo kreskis senchese kaj laborigo, eduko kaj kuracado farighis problemo komune zorgata de la tuta socio. "Ja estas ghojinde, ke la gvidantoj de la nova registaro estas sobraj kaj ne blinde ghojas pri la sukceso, nek preteratentas la realajn malfacilojn," diris Ma Shujie, reprezentanto de Heilongjiang-provinco.

La scienca koncepto de disvolvigho elmetita de la novaj gvidantoj estas multe atentata temo en la du sesioj. Chefministro Wen Jiabao diris en sia parolado, ke Chinio devas strebi ne nur al la ekonomia kresko, sed ankau al laborigo, eduko, sciencoj, tekniko, media protektado, kulturo, higieno, socia garantio kaj socia justeco. Profesoro Wang diris, ke la nova koncepto de disvolvigho devas atenti kvaliton, sed ne sole kvanton kaj nepre devas turni sin al materia utilo, ghuebla de la popolo. Fakuloj diris, ke por realigi la novan koncepton de disvolvigho la registaro devas rezervi manovrospacon en ellaborado de la plano pri ekonomia disvolvigho de 2004.

La nunaj gvidantoj estas tre sentemaj pri la ciferoj. Ili preteratentis neniun malgrandan shanghighon de la ciferoj, kio profunde impresis la cheestantojn de la kongreso kaj konferenco. Eksambasadoro de Svislando en Chinio komparis la cerbon de Wen Jiabao kun komputoro memoranta multege da donitajhoj.

Enketo montras, ke en 2003 pro SARS miloj kaj dekmiloj da kamparaj laboristoj restis hejme kaj pro tio la pokapa kamparana enspezo en la dua trimestro de la pasinta jaro reduktighis je 35 juanoj kaj la centra registaro rimarkis tion kaj tuj decidis turni grandan atenton sur kompenson de la perdo de la kamparanoj kaj pliigon de ilia enspezo. Februare de 2004 la centra registaro publikigis dokumenton por akceli pliigon de enspezo de la kamparanoj kaj garantii la agrikulturan disvolvighon. Fakuloj antauvidis, ke en 2004 la chinaj kamparanoj enspezos almenau 20 miliardojn da juanoj dank' al la nova politiko.

"La nunaj gvidantoj chiam zorgas pri la propraj interesoj de la popolanoj," diris Zhu Xianfa, reprezentanto de la china popola kongreso kaj prezidanto de la Komisiono por Disvolvo kaj Reformado de Anhui-provinco. Li diris ankau, ke la operacio de obligado kaj divido fare de la chefministro celas garantii la dauran kaj harmonian disvolvighon de la lando.