De januaro de 2008 oficiale ekpraktikiĝis baza medicina asekuro por loĝantoj en Ŝanhajo. Tio signifas, ke la sistemo de medicina asekuro inkluzivis ĉiujn ŝanhajanojn (13.5 milionoj), inkluzive de maljunuloj, neplenkreskuloj, orfoj kaj handikapuloj, kiuj ne aliĝis al la medicina asekuro antaŭe, kaj pli ol 3 milionojn da laboruloj venintaj de aliaj lokoj en Ŝanhajon.

En la lastaj jaroj la ŝanhaja registaro faris multon por helpi kaj faciligi kuracadon de la popolanoj.

Nova politiko de la medicina asekuro disvastiĝis al pli multaj homgrupoj

71-jara s-ino Chen Xiaomei suferas koronarian kormalsanon, sukeran diabeton kaj cerban embolon, kaj ĉiujare ŝi devas elspezi kelkmil juanojn por kuracado. Ŝi vivtenas sin per monhelpo de la entrepreno de sia edzo forpasinta. Pro malbona financo la entrepreno ofte prokrastis pagon de la kuraco, kaj ŝi bezonis monhelpon de siaj gefiloj. Meze de la pasinta jaro Ŝanhajo funkciigis politikon de la medicina asekuro por maljunaj vidv(in)oj de laboruloj. Ĝuinte la medicinan asekuron la unua afero por s-ino Chen estis akcepti koran operacion. Dank' al la asekuro ŝi pagis nur malgrandan parton de pli ol 100 mil juanoj da operacia kosto. Ŝi diris: "Antaŭe mi timis viziti hospitalon pro manko de mono, nun mi povas. La nova politiko savis min."

En la pasintaj 7 jaroj, post praktiko de reformado de la medicina asekuro en Ŝanhajo, aliĝis al la medicina asekuro ĉiuj laboruloj urbaj kaj urbetaj, 2 milionoj da kamparanoj kaj 3.3 milionoj da laboruloj venintaj de ekster Ŝanhajo. Tamen pro historia kialo, parto de la homoj kiel Chen Xiaomei ankoraŭ ne povis aliĝi al la medicina asekuro. Ekde 2006 Ŝanhajo enlistigis maljunulojn, neplenkreskulojn, seriozajn handikapulojn kaj maljunajn vidv(in)ojn kiel asekuratojn. La nova medicina asekuro ellaborita en januaro de 2008 ordigis antaŭajn politikojn kaj plue altigis justecon de la garantio.

Difinitaj hospitaloj en loĝkvartaloj faciligis kuracadon de popolanoj

Sekve de pligrandiĝo de urboj, nemalmultaj urbanoj transloĝiĝis de la urbocentro malproksimen. Pro manko de hospitalo en ilia loko la loĝantoj devas veturi longtempe en urbocentro por viziti kuraciston. Konsiderante la malfacilon de la popolanoj rilataj departementoj pene klopodis por faciligi kuracadon de la popolanoj.

En la urbeto Pengpu de Zhabei-distrikto malproksime de la urbocentro loĝas pli ol 100 mil homoj. Kvankam ili aliĝis al la medicina asekuro, sed en ilia loko ne estis hospitalo difinita de la medicina asekuro. Tio maltrankviligis s-inon Liu Suhuai. Ŝia edzo longtempe kuŝas en lito pro apopleksio kaj ilia filo vivas ĉiam en rulseĝo pro cerba paralizo. Por iri al hospitalo difinita, ŝi devis kune kun siaj familianoj iradi 40 minutojn puŝante rulseĝon kaj estis pli malfacile se en vento kaj pluvo. En la lasta oktobro, Haiying-hospitalo en la urbeto estis asignita kiel difinita hospitalo de la medicina asekuro. Liu Suhuai kaj aliaj lokanoj povas atingi hospitalon en kelkaj minutoj.

Sekvante antaŭenpuŝon de la reformado de la medicina asekuro Ŝanhajo disvastigis konstruadon de komputila kontosistemo de la medicina asekuro interliganta pli ol 1000 difinitajn kuracejojn de la medicina asekuro kaj 251 servejojn por faciligi pagon de malsanuloj. En 2003 Ŝanhajo fondis servejon de la medicina asekuro en ĉiuj loĝkvartaloj kaj urbetoj kaj formis trinivelan retan sistemon de urbo, distrikto, gubernio kaj urbeto.

Aldona medicina asekuro liveris pli bonan kuracan garantion

Konsiderante bezonon de malsamaj homgrupoj en medicina garantio la ŝanhaja registaro, subtenate de organo de civila administrado, sindikato, Ruĝa Kruco kaj aliaj sociaj rondoj, establis bazan medicinan asekuron, aldonan medicinan asekuron kaj minimuman medicinan helpon por ke ĉiuj loĝantoj ne nur ĝuu la asekuron, sed ankaŭ ricevu pli bonan medicinan garantion.

Gao Jinrong estas pensiulo de magazeno de Ŝanhajo. Antaŭ du jaroj ŝi enhospitaliĝis pro subita cerba hemoragio kaj la kosto por kuracado estis tre alta. Dank' al la aldona medicina asekuro ŝi ricevis ne nur subvencion de la baza medicina asekuro, sed ankaŭ tiu de la aldona medicina asekuro je 76 mil juanoj. Ŝia edzo diris dankoplene: "La aldona medicina asekuro trankviligas nin."

Post kompleta praktikado de la baza medicina asekuro en Ŝanhajo rilataj departemento donis ankoraŭ kelkajn aldonajn garantiajn rimedojn. La medicina interhelpa plano por laboruloj estis prezentita de la Federacio de Sindikatoj de Ŝanhajo, kiu helpas 2.3 milionojn da laboruloj kaj 2.7 milionojn da pensiuloj. La medicina interhelpa fonduso por infanoj kuracataj en hospitalo estis starigita de la Ruĝa Kruco de Ŝanhajo. Pagante 50-60 juanojn ĉiujare, oni povas ricevi subvencion de 50% de la kuraca kotizo post pago de certa monsumo, kiam ili enhospitaliĝis aŭ grave malsaniĝis. La kurachelpa rimedo por ŝtataj oficistoj donas al grave malsaniĝintaj ŝtatoficistoj certan monsumon post pago de baza medicina asekuro. Nun rilataj institucioj disvastigis la medicinan helpon de homoj helpataj de organo de civila administrado al asekuritaj laboruloj en malriĉaj familioj, de familioj ĝuantaj garantion de la minimuma vivnivelo al tiuj malmulte enspezantaj en urboj kaj urbetoj. En 2007 en Ŝanhajo 103 mil homfojoj akiris aldonan medicinan helpon je 110 milionoj da juanoj.

Ni tre ŝatus vian sugeston, klaku kaj donu vian voĉon!

>>> Ĉefpaĝo