| 2010-03-24 La kapablo kaj stato de ILEI dependas kritike je la laborfortoj kiuj estas troveblaj. La celo de taskalvokoj estas detaligi taskojn, kiuj ne havas plenumantojn. Proponantoj bonvolu mesaĝi al la sekretario (margareta.ilei.pollando) kaj al la prezidanto (stefan.macgill@gmail.com) de kiu vi tamen atendu prokrastitan respondon.
Wikipedio
Respondeculo por kontroli kaj aktualigi informojn en Wikipedio pri ILEI kaj la instruado de Esperanto kaj instruista trejnado. Tiu persono krome ricevos komunikojn pri la agado de ILEI kaj aliron al ILEI- kaj IPR-arkivoj, kaj kreos novajn enciklopediecajn artikolojn.
Retliga prizorganto
Respondeculo por rigardi la ligojn en niaj hejmpaĝoj al eksteraj paĝoj, por kontroli la aktualecon de la ligoj kaj la enhavo kiun ili prezentas. Tiu persono krome kontrolos ĉu tiuj celataj hejmpaĝoj havas ligon al la hejmpaĝo de ILEI, kaj ĉu ligitaj informoj pri ILEI estas aktualaj. Inkluzivas aktualigon kaj ampleksigon de la informoj pri ILEI en hejmpaĝoj de UEA, TEJO kaj similaj.
Varba aganto
Respondeculo kun sperto pri komunikado kaj ret-eldonado, kiu okupiĝos pri la arigo kaj pretigo de varbaj materialoj en Esperanto kaj naciaj lingvoj. Inter la taskoj estos arigo de fotoj pri instruado ajnspeca kaj esperanta, kaj la laboro de ILEI kaj ĝiaj sekcioj, por aperigo en nia varbiloteko. Bildoj estu en retpaĝa kvalito (96 dpi) kaj preskvalita (400 dpi).
Retformulara eksperto
Respondeculo kapabla starigi retajn formularojn por registri membrojn, konferencanojn, abonantojn de Juna amiko aŭ kandidatojn por konkursoj, kies plenigitaj datumoj aŭtomate eniros datumbazan sistemon.
Komisiito pri eldonado
Respondeculo kun fakaj, eldonistaj, redaktoraj kaj organizaj kapabloj, kiu pretigos ligajn eldonaĵojn por presado; tio povas inkluzivi lernilojn, simpoziajn kajerojn el niaj konferencoj kaj apogajn materialojn por instruista trejnado.
Aldone aperis alvokoj por ĝis kvar helpantoj por Juna amiko - vidu la enkondukon de Juna amiko 2009/3 (legebla ankaŭ en nia hejmpaĝa enirpaĝo). Ni jam havas du kandidatojn, kiujn ni nun enkondukas en la laboron.
ILEI ne estas en pozicio oferti salajrojn, sed por akceptitoj de iuj el tiuj oficoj, ĝi povos oferti modestajn honorariojn - ĉio laŭ negoco.
Stefan MacGill,
17 marto2010.
（el http://www.ilei.info/novajxoj/taskalvokoj.php）
Redaktoro: Niu Xueqin | 
