| 2010-05-10
La 7-an de majo inaŭguriĝis la kurso de Esperanto en la universitato Baiyun en Kantono, ĉefurbo de Guangdong-provinco, Ĉinio.
Dum la malferma ceremonio oni laŭtlegis salutmesaĝojn de landaj kaj internaciaj Esperantaj organizaĵoj, fare de gestudentoj.
La ceremonion ĉeestis, krom la studentaro, lokaj esperantistoj, kaj reprezentantoj de la universitato Baiyun. Mallongajn prelegojn faris s-ro Petro Ye, vicprezidanto de la Esperanto-Asocio de Kantono, s-ro Augusto Casquero, hispana samideano kaj s-ro Dai Shengqiao, profesoro de tiu ĉi universitato, organizanto de la kurso kaj ties instruisto.
La tuta ceremonio estis kortuŝa, kaj la ĉeestantoj kaj gelernantoj montris grandan entuziasmo en lernado de la internacia lingvo Esperanto.
Fine oni kantis la himnon de Esperanto "La Espero".
Tio certe estas kaj estos kuraĝigo por la supre menciita universitato kaj ankaŭ por aliaj universitatoj kaj lernejoj de Ĉinio.
(Kontribuo de Augusto Casquero el Hispanio)
Redaktoro: Wang Lihua
| 
