| 2010-07-14
|
 |
|
Parlamentanino prof. Krystyna Łybacka |
La 17-an de majo parlamentanino, prof. Krystyna Łybacka proponis interpelacion pri Esperanto. Ĝi estas konsekvenco de la renkontiĝo de la Iniciata Grupo “Esperanto por EU” kun la vicprezidanto de la Pollanda Sejmo (parlamento) Jerzy Szmajdziński (la 4-an de marto de 2010) kaj de la renkontiĝo kun prof. Łybacka (la 29-an de marto de 2010), kaj posta korespondado.
Sube estas la teksto, ricevita en Varsovio la 20-an de majo.
*** *** ***
Eduardo Kozyra
Al Estimata Sinjoro
Bronisław Komorowski
Prezidanto de la Pollanda Sejmo
Estimata Sinjoro Prezidanto.
Laŭ la artikolo 193 de la Regularo de la Pollanda Parlamento mi transdonis al la manoj de la Prezidanto de la Pollanda Parlamento la skriban interpelacion pri instruado de Esperanto, direktitan al la ministro de la Nacia Edukado.
Estimata Sinjorino Ministro,
La lingvo Esperanto, kreita de Ludoviko Zamenhof, estas granda lingvistika atingaĵo, pro kiu ni poloj devus esti tre fieraj. Trista fakto estas, ke ĉi tiu lingvo malgraŭ sia populareco en la tuta mondo, ne estas aprezata en la lando, en kiu ĝi ekestis.
La ĉefaj kvalitoj de Esperanto estas ĝiaj simpleco kaj facileco de la lernado. Kiel montras la esploraj rezultoj en aliaj landoj, kunigo de la lernado de Esperanto kun lernado de aliaj lingvoj, ebligas pli bonan lernadon.
Polaj esperantistoj de multaj jaroj klopodas oficialigi Esperanton en la publikaj lernejoj. Tamen sur ĉi tiu vojo estas leĝaj problemoj, ligitaj kun la falsa klasifiko de la lingvo kiel artefarita. Tio malebligas alligi Esperanton al la fremdaj lingvoj, kiujn lernantoj povus elekti kiel devigan studobjekton.
La Ministerio de la Nacia Edukado havas eblecon iniciati la programon, kies celo estus oficialigo de Esperanto en la pollandaj lernejoj. Tia solvo kuraĝigus junajn polojn ekkoni la universalan lingvon, kies valorojn konas iliaj samaĝuloj en aliaj landoj.
Mi tre petas sinjorinon ministron respondi, ĉu la Ministerio de la Nacia Edukado planas entrepreni agadon al la celo de popularigo kaj diskonigo de Esperanto inter polaj gelernantoj, kaj, se jes, en kiu formo ĝi estos realigota.
Kun estimo,
Krystyna Łybacka
(el La Ondo de Esperanto, 2010, №7. )
Redaktoro: Wang Lihua
| 
