| 2010-08-02 Altestimataj,
Jam delonge mi aŭdis pri via tre grava seminario. Mi gratulas kaj dankas la organizantojn. Mi gratulas ĉiujn, kiuj aliĝis kaj venis. Vi intencas pliboniĝi, plilertiĝi en la uzo kaj instruado de nia lingvo, gratulon pro tio!
Bedaŭrinde mi ne povis organizi mian venon al Ĉinio por tiu grava evento. Mi tre bedaŭras.
Mi atente legis la programon de la seminario en Taiyuan kaj ricevis tre pozitivan impreson pri la daŭro, temo pri dekunu-taga seminario. Pri la eroj: interesaj prelegoj, kursoj kaj debatoj. Mi vidis, ke parto rilatas al mondcivitanoj; tio feliĉigas min, ĉar mi estas mondcivitano. Fakte ĉiuj esperantistoj estas mondcivitanoj!
Mi revidis aŭ ekkonis en Ulanbatoro plurajn gesamideanojn el Ĉinio kaj povis ricevi tre bonan impreson pri ilia lingvonivelo, ĝeneralaj kapabloj kaj grandega motivigo por subteni nian movadon en Ĉinio. Mi gratulas kaj dankas ilin. Konante unu la alian ni povos efike kunlabori kaj mi klopodos subteni vin laŭ miaj ebloj. En Ulanbatoro venis deziroj kaj sugestoj al estraroj de UEA kaj ILEI kaj peto al mi transdoni tiujn sugestojn; jam mi faris. Se mi povas efike ludi perantan rolon inter vi kaj la aŭtoritatuloj de nia movado, mi tre volonte faros. Ofte oni aŭdas, ke Esperanto estas ĉefe gvidata el Eŭropo. Tamen nia UEA-prezidanto estas aziano, el Barato, sinjoro Dasgupta. kaj ni ne forgesu, ke Ĉinio estas proksimume same granda kiel tuta Eŭropo!
Kiel prezidanto de Internacia Ekzamena Komisiono mi zorgas pri Internacia Rajtigita Ekzamenantaro (IRE); mi konstatis, ke por Ĉinio estis nur Sinjoroj Han Zuwu, Li Weilun kaj Hu Guozhu. Feliĉe ni povis aldoni gesinjorojn:
-- GONG Xiaofeng “Arko”
-- LIU Baoguo “Optimisto”
-- LIU Jianguo
-- PENG Zhengming
-- WANG Tianyi “Ĉielismo”
-- YU Jianchao
Do nun staras en tiu grava listo naŭ personoj por Ĉinio.
Ni estas tre feliĉaj pri tiu elektado kaj esperas je fruktodona kunlaboro. Gratulon al tiuj novaj IREanoj.
Mi deziras rememorigi vin, ke ekde somero 2009 sinjoro Han Zuwu estas membro de Internacia Ekzamena Komisiono.
Por la nun komencanta seminario mi deziras al vi interesajn prelegojn, fruktodonajn interparoladojn kaj valoran interŝanĝon de spertoj.
Fartu bone! Ĝuu esperanto-etoson!
Elkore salutas,
Mirejo Grosjean el Svislando
Prezidanto de Internacia Ekzamena Komisiono
Prezidanto de Svisa ILEI sekcio
Komitatano A por Svislando ĉe UEA
Delegito de UEA ĉe Unuiĝintaj Nacioj en Ĝenevo
(Redaktoro: Liu Zijia) | 
