| 2010-09-01
En la jaro 2011 ILEI konferencos en Kopenhago, unu semajnon antaŭ la UK, de la 17-a ĝis la 23-a de julio, kun la tradiciaj kleriga, faka, organiza kaj kultura programoj, kaj, kiel ĉiam, kun io nova. Tiel la konferencanoj povos plani unuvojaĝe dusemajnan restadon dum la du eventoj por plene ĝui la riĉajn konferencan kaj kongresan programojn, kaj konataĝi kun la kulturo de Danio kaj belaĵoj de ĝia ĉefurbo kaj aliaj vizitotaj lokoj.
La konferenca temo: Lingva politiko kaj lingvaj rajtoj en edukado kaj scienca komunikado
La temo enfokusigas lingvan politikon kaj sintenon de ŝtataj kaj klerigaj instancoj, konsekvencojn de ties tiutemaj decidoj, staton kaj evolutendencojn de la lingvaj rajtoj en edukado kaj scienca komunikado konekse kun la oficiala lingva politiko, kaj pozicion de Esperanto en tiu kunteksto.
Simpozio pri la konferenca temo
ILEI ĉi-foje organizas la simpozion kunlabore kun la Universitato de Kopenhago, Fakultato de Humanistiko, Departamento pri komunikiloj, kognado kaj komunikado, kiu ankaŭ disponigos la konferencejon kaj simpoziejon. La simpozio okazos en la lastaj du konferencaj tagoj, la 22/23-an de julio, do unu tagon pli frue ol UK komenciĝos.
Loĝado kaj manĝado
La loĝado estos aranĝita en la hotelo Cabinn (en kiu eblos ankaŭ mendi ĉe UEA la loĝadon dum UK) kaj en malpli kosta studenta domo Handvarker-Skolehjemmet.
Favorkosta manĝado eblos en la universitata bufedo kun varia oferto, apud la konferencejo.
Programo
Dimanĉo: alveno kaj interkona vespero.
Lundo: solena malfermo kaj komenco de laboro; dana vespero.
Mardo: daŭrigo de prelegoj, seminarioj, laborkunsidoj; internacia vespero.
Merkredo: ekskursoj kaj alternativaj programeroj; distra vespero.
Ĵaŭdo: pliaj prelegoj, kunsidoj, diskutrondoj; universitata agado; lingva festivalo; bankedo.
Vendredo: simpozia tago kun ekskursoj alternative; adiaŭa vespero.
Sabato: konkluda sesio de la simpozio, solena fermo; transiro al UK.
Du tuttagaj ekskursoj ekster Kopenhago kaj duontagaj promenekskursoj tra la urbo kun lokaj esperantistoj kiel ĉiĉeronoj ebligos konatiĝi kun la lando de Hamleto kaj ĝia ĉefurbo.
Aliĝoj kaj mendoj
Aliĝilo kaj mendilo kun kotiztabelo, prezoj kaj pli detalaj informoj baldaŭ aperos ĉi tie en ambaŭ formoj: por elpresi kaj uzi paperan aliĝilon, aŭ por elektronika aliĝo. Papera aliĝilo aperos ankaŭ en IPR 10/4.
el ILEI
Redaktorino: Chen Ji | 
