| 2010-09-30
Kutime, Espéranto-Vendée organizis sian jaran piknikon komence de la somero kaj de la libertempa periodo. Pro netaŭgeco de la datoj, la asocio provis ĉi-jare fine de la somero, do, antaŭ la malfermo de la kursoj. Estis anoncite, ke ĝi estas malfermata al la publiko, precipe al personoj interesiĝantaj pri Esperanto, eventuale pri ĝia lernado.
Tio ebligis al du interesatoj pli bone konatiĝi kun la kursgvidantoj en malstreĉa etoso. El 15 partoprenintoj, venis mezaĝulo, kiu ĵus komencis la lernadon, kaj juna virino, kiu decidis partopreni en la sama kurso en Beaulieu-sous-la-Roche. La asocio de diskonigo de la vendea puatua kulturo "La Soulère" afable disponigis sian sidejon al Espéranto-Vendée por la cirkonstanco.
Malfermi niajn renkontiĝojn al la publiko, eviti vivon en fermita medio, tio devas esti nia konstanta zorgo. Bonvenaj estos raportoj pri similaj alilandaj spertoj en organizado de tiaj aranĝoj.
(Kontribuo de Henri Masson el Francio)
Redaktoro: Wang Lihua
|
