Pekino, hejmloko de Pekin-homoj, estas antikva chefurbo kun historio de pli ol 3000 jaroj. Notoj kaj antikvaj restajhoj konstatis, ke la konstruado de Pekino komencighis 1045 jarojn a.K. Estante chefurbo de 5 dinastioj, Pekino ludis gravan rolon en la longa historio de la china nacio. En la 600 jaroj post kiam Kublajo prenis Pekinon chefurbo en 1267, la dinastioj Yuan, Ming kaj Qing prenis Pekinon chefurbo kaj pli ol 30 imperiestroj regis Chinion kun vasta teritorio kaj granda loghantaro, kaj tie la civilizacio de miloj da jaroj heredighis kaj disvolvighis.

En la 1-a de oktobro de 1949 fondighis la nova Chinio kaj Pekino farighis ghia chefurbo kaj politika kaj kultura centro. La Imperiestra Palaco, la Granda Muro che Badaling, la Somera Palaco, la Chiela Altaro kaj la Ruino de Restadejo de Pekin-homoj che Zhoukoudian estis enskribitaj de Unesko en la Liston de Mondaj Kulturaj Heredajhoj.

Tian'anmen-placo

La placo situas en la centro de Pekino kaj areas 44 hektarojn. Ghi estas la plej granda placo en la mondo. La placo estas loko por plej gravaj solenoj kaj mitingoj de Chinio. La chiutaga ceremonio de levo kaj mallevo de la nacia flago che la levigho kaj subiro de la suno sur la placo estas multe rigardata.

Norde de la placo estas Tian'anmen-pordego en alto de 33.7 metroj, kun 5 pasejoj. Oriente de la placo estas la China Historia Muzeo kaj la China Revolucia Muzeo, okcidente la Popola Halo kaj sude Monumento de Popolaj Herooj kaj la Memorhalo de Mau Zedong.

Inter la pordego kaj la placo estas la movoplena Chang'an-strato.

La Imperiestra Palaco

La Imperiestra Palaco, alinome Malpermesita Urbo, kushas en la urbocentro de Pekino, tuj post Tian'anmen-placo. Ghi estis imperiestra palaco de Ming- kaj Qing-dinastioj. Ghia konstruado komencighis en 1406 kaj finighis en 1420. 24 imperiestroj vivis en la palaco.

La palaco larghas 750 metrojn de oriento al okcidento kaj profundas 950 metrojn de sudo al nordo, kun totala areo de 720 mil kvadrataj metroj. Ghia plank-areo superis 150 mil kvadratajn metrojn. Ghi estas la plej granda kaj bone konservata antikva palaco de la mondo. Nun ghi estas shtata muzeo kun miliono da kulturaj restajhoj.

La palaco estas chirkauita de rivero kun largheco de 52 metroj kaj muro en totala longo de 3 kilometroj. La muro altas 10 metrojn kaj la bazo larghas 8.62 metrojn. La muro havas po unu pordegon en kvar flankoj kaj che la muranguloj staras po unu bela turo.

La palaco konsistas el du partoj: la ekstera korto kiel oficejo de imperiestroj kaj la interna korto kiel loghejo de imperiestroj kaj iliaj familianoj. En la ekstera kortego estas tri grandaj haloj Taihe, Zhonghe kaj Baohe. Taihe-halo estas la plej granda kaj plej impona el la tri haloj. Ghi larghas 60 metrojn, profundas 33 metrojn kaj altas 35 metrojn. Tie okazis ceremonioj por surtronigho kaj edzigho de imperiestroj, titolado de imperiestraj edzinoj, nomumo de komandantoj kaj ekiro de ekspedicio. En la interna korto estas la halxoj Qianqing, Jiaotai kaj Kunning por imperiestroj kaj iliaj edzinoj. En tradicia koncepto de Chinio la centra loko estas plej nobla, tial chiuj konstruajhoj en la ekstera korto de la Malpermesita Urbo estis faritaj simetrie sur la rekta suda-norda akso de Pekino.

La konstruajhoj de la palaco el ligna strukturo havas tegmenton tegitan per flave glazuritaj tegoloj. La domoj sidas sur bazamento el grizetaj shtonoj kaj la muroj kaj plafono interne de la domoj estas pompe farbitaj. La palaco nombras 9999.5 chambrojn, char legendo diras, ke la Chiela Palaco havas dek mil chambrojn, kaj la nombro de chambroj de palaco en la homa mondo ne devas superi dek mil, tial la Imperiestra Palaco havas chambrojn je duono da chambro malpli multe ol la Chiela Palaco.

La Chiela Altaro

Se oni prenas Tian'anmen-pordegon simbolo de Chinio, do la Chiela Altaro (vidu la kovrilon de la unua bulteno) estas simbolo de Pekino.

Kelke da kilometroj sudoriente de la Imperiestra Palaco estas grandioza ghardeno kun multaj imponaj konstruajhoj. Tie estas la Chiela Altaro kun areo de 2.37 milionoj da kvadrataj metroj. Ghi estis konstruita en 1420 kaj tie la imperiestroj kultis la chielon kaj preghis por richa rikolto.

La Chiela Altaro estas trezoro de la china arkitekturo. Ghi konsistas el la Interna Altaro kaj Ekstera Altaro. La suda chirkaumuro estas kvadrata por simboli, ke la tero estas kvadrata; kaj la norda chirkaumuro - ronda por simboli, ke la chielo estas ronda. En la Chiela Altaro estas la Chiela Kultejo, Halo de Imperia Chielvolbo kaj Ronda Altaro.

La Chiela Kultejo estas la plej impona kaj bela el la tri konstruajhoj. La tri aleroj de la konusforma tegmento estas tegitaj ne per flavaj, sed per blue glazuritaj tegoloj por simboli la bluan chielon. En la halo de la kultejo estas multaj simboloj, ekzemple la 4 kolosaj kolonoj ornamitaj per drakoj en la mezo de la halo simbolas 4 sezonojn kaj la 12 cinabrokoloraj fostoj chirkau la 4 kolonoj simbolas 12 monatojn. La tegmento estas subtenata de 28 kolosaj fostoj el nanmu-ligno. La konstruajho altas 38 metrojn kaj la diametro de la ronda planko estas 30 metroj.

Antau la Halo de Imperia Chielvolbo estas vojeto el shtonaj platoj. Kiam oni sonas starante sur la 18-a shtona plato, la sono atingas la nordorientan angulon de la orienta flanka halo kaj la nordokcidentan angulon de la okcidenta flanka halo 36 metrojn fore. Se oni sonas en tiuj du anguloj, aliaj starantaj sur la 18-a shtona bloko povas audi la sonon. La halo havas rondan chirkaumuron el fajne poluritaj brikoj, kaj oni nomas ghin Ehha Muro. Malgrau ke oni mallaute sonas antau la muro, aliaj povas audi ties sonon kie ajn che la muro.

En la ghardeno de la altaro estas multaj cipresoj de pli ol cent jaroj.

La Somera Palaco

La turistoj neniel devas preterlasi la Someran Palacon, char ghi estas la plej granda imperiestra ghardeno de la mondo.

La palaco sin trovas en la nordokcidenta antauurbo de Pekino kaj areas 290 hektarojn.

La palaco havas historion de pli ol 250 jaroj. Antaue ghi nomighis Qingyiyuan (ghardeno de klara ondo) kaj estis detruita de la Brita-Franca Alianca Armeo en 1860. En 1888 ghi estis riparita kaj akiris la nunan nomon. Sed en 1900 ghi estis refoje detruita de la Okpotenca Alianca Armeo kaj rekonstruita en 1903, kaj de tiam ghi farighis somerumejo imperiestra patrino Cixi. En 1908 Cixi kaj imperiestro Guangxu forpasis kaj la ghardeno chesis servi kiel imperiestra ghardeno. Post kiam la kortego de Qing-dinastio estis renversita, la ghardeno malfermighis al la publiko.

La Somera Palaco konsistas el Wanshou-monto kaj Kunming-lago. En la palaco estas tri chefaj grupoj da konstruajhoj. La unua grupo kun Renshou-halo kiel la centro estis loko por politika aktivado de la kortego. La dua grupo kun Leshou-halo kiel la centro estis loghejo de imperiestra familio kaj la tria grupo kun Wanshou-monto kiel la centro estis ghardeno. En la palaco estas pli ol 3000 chambroj, kaj antau la monto estas la 728-metra Longa Koridoro kun pli ol 8000 pentrajhoj. La peze ombrata monto, la ondetanta lago, la imponaj domoj, la vegetaloj aranghitaj lau hortikulturo... similas al pejzagha pentrajho kun klara karakterizajho de la china kulturo.

La Granda Muro

La Granda Muro estas la unua vidindejo de Chinio.

Ghia konstruado estis komencita antau 2000 jaroj. Por bari entrudighon de nordaj hordoj, la duklandoj komencis konstrui muron en gravaj lokoj imitante unu alian.

221 jarojn a.K., kiam la Unua Imperiestro de Qin-dinastio unuigis Chinion, li komencis interligi la murojn konstruitajn respektive de la duklandoj. En la pasintaj 2000 jaroj la Granda Muro suferis naturan kaj homan detruon kaj nun oni vidas nur ruinojn de la interrompitaj muroj. La plej bone konservata kaj plej fortika parto de la Granda Muro estis konstruita en Ming-dinastio. Ghia okcidenta ekstremo estas Jiayu-pasejo en Gansu-provinco kaj ghia orienta ekstremo situas che Yalu-rivero, kaj la totala longo de la Granda Muro superas 6000 kilometrojn.

Sur la lokoj de komanda alto kaj kurbighoj de la muro estas alarmturoj. Kiam venis invadantoj, la garnizonantoj bruligis lupan merdon por doni signalon al la najbaraj alarmturoj. Oni diras, ke brulanta lupan merdo donas tre fortan fumon. La vizitantoj senescepte admiregas la grandiozecon kaj imponecon de la muro.

La Granda Muro estis atestanto de historio plena de militoj. Nun chiuj nacioj de Chinio vivas en granda harmonio kaj la Granda Muro ne plu ludas la rolon de barilo. La vizitantoj de diversaj landoj rigardas la Grandan Muron simbolo de paco, interligilo de amikeco kaj turisma vidindejo.

La Granda Muro havas 600 kilometrojn en Pekino kaj ghiaj partoj che Badaling kaj Juyongguan estas bone protektataj kaj multe frekventataj.

La Dek Tri Mauzoleoj de Ming-dinastio

La Dek Tri Mauzoleoj de Ming-dinastio situas sub Tianshou-monto en la nordo de Pekino, 50 kilometrojn for de la urbocentro. Tie eterne dormas 13 imperiestroj kaj iliaj 23 edzinoj. La tombejo kun areo de 40 kvadrataj kilometroj estas chirkauita de montoj en tri flankoj kaj sude estas malgranda ebenajho trafluata de zigzaga rivero.

La hipogeoj estas tre profundaj, kaj neniam okazis prishtelo. Ili estas la plej bone konservataj imperiestraj tomboj en la historio de Chinio. La vidindejoj de la Dek Tri Mauzoleoj estas la Dia Vojo, Changling-mauzoleo, Dingling-mauzoleo kaj Zhaoling-mauzoleo.

Che la enirejo de la tombejo staras arkado el blanka marmoro konstruita en 1540. Ghi estas la plej granda kaj plej delikata arkado de Chinio. Inter la arkado kaj Changling-mauzoleo estas la Dia Vojo longa je kelke da kilometroj. Ambauflanke de la vojo staras po unu vico da shtonaj figuroj de korteganoj kaj bestoj. Ankau tio estas malofta en la antikvaj tombejoj de Chinio.

Changling estas mauzoleo de la tria imperiestro de Ming-dinastio, la plej granda el la 13 mauzoleoj. Ghia Kulta Halo estas unu el kvar plej famaj haloj de Chinio.

Dingling estas mauzoleo de la 14-a imperiestro de Ming-dinastio Zhu Yijun (1563-1620) kaj liaj edzinoj. Ghi estas la sola malfermita el la 13 mauzoleoj. Ghi estas malpli granda ol Changling, sed ghia arkitekturo estas la plej delikata inter la 13 mauzoleoj. La hipogeo de la mauzoleo estas farita el blu-grizaj shtonoj kaj la planko kovras 1195 kvadratajn metrojn. Arkeologoj trovis en la hipogeo pli ol 3000 valorajhojn inkluzive oran drakan kronon de la imperiestro kaj feniksajn kronojn de liaj edzinoj.

Beihai-parko

Beihai-parko situas en la centra regiono, tre proksime al la Imperiestra Palaco.

Ghi estis provizora palaco kaj ghardeno de imperiestroj de Liao-, Jin-, Yuan-, Ming- kaj Qing-dinastioj. La parko kovras 68 hektarojn kaj lago okupas pli ol duonon de la areo. En la lago estas monteto kaj supre staras blanka pagodo, kiu altas 35.9 metrojn, kronante amason da konstruajhoj. En la sudo de la parko staras kastelo nomata Ronda Urbo. En la nordo de la parko estas Naudraka Ekranmuro, kaj sur ambau ghiaj flankoj reliefe prezentighas po 9 drakoj en diversaj pozoj.

Shichahai-lago

Shichahai estas pitoreskejo kaj loghkvartalo plena de antikva gusto kaj folkloro de la malnova parto de Pekino. Tie oni povas vidi detalajhojn de la popola vivo en la antikvaj stratoj. Sude ghi najbaras al Beihai-parko.

Shichahai-lago konsistas el lagetoj Qianhai, Houhai kaj Jishuitan. En somero ili donas kvietan etoson dank' al la spegulaj akvoj borderitaj de plorsalikoj, kaj en vintro ili estas bonaj skiejoj.

Chirkau Shichahai-lago estas multaj tipaj pekinstilaj popolaj domoj, nome domoj kun kvadrata korto en la mezo, chirkauita de chambroj en kvar flankoj. Tie estas ankau multaj shtatnivelaj protektendaj antikvaj konstruajhoj, ekzemple la Kampanilo, la Tambura Turo, la Domo de Princo Gong kaj loghejoj de multaj famuloj, kaj zigzagas stratetoj.

La turistoj povas veturi per rikisho por vidi scenojn de la popola vivo en la stratetoj che Shichahai.