Krom rigardi naturajn pejzaghojn kaj vidindajhojn de homa kulturo, la fremdlandaj turistoj senescepte deziras ankau ghui la chinan kulinaran arton. Kompreneble chie en la mondo trovighas restoracioj de china gastronomio, sed frandi centpocentajn chinajn pladojn en Chinio estas tute alia afero.

Unue, la china gastronomio akcentas harmonian kunfandighon de gustoj acida, sala, amara, akra kaj dolcha; due, la pladoj devas plachi per koloro, odoro, gusto kaj plastiko; kaj trie, la chinoj bone komprenas la interrilatojn de gastronomio kaj sano, tial oni akcentas dece proporcian kunaranghon de viando, legomoj kaj greno.

La china gastronomio konsistas chefe el 4 sistemoj, nome tiuj de la provincoj Jiangsu, Guangdong, Sichuan kaj Shandong. La pekina gastronomio apartenas al la gastronomia sistemo de Shandong. Sed nun en Pekino estas restoracioj de chiuj gastronomiaj sistemoj de la lando.

Rostita anaso

Multaj fremdlandaj vizitantoj jam scias la Grandan Muron kaj rostitan anason de Pekino antau ol veni al Chinio. Do rostita anaso povas esti la unua plado de la china gastronomio.

Unue kuiristo tranchas rostitan anason en multajn maldikajn pecojn. La klientoj trempas anasan pecon en dolcha misoo, metas ghin en molan flanon maldikan kiel papero kune kun shenoprazaj pecoj kaj kukumaj strioj 2-3 colojn longaj, kaj faras ilin rulagho.

En Pekino estas multaj restoracioj de rostita anaso kaj la prezoj estas malsamaj. Restoracio de Rostita Anaso Quanjude fondita en 1864 estas la plej fama en Pekino.

Kulinara arto de kortego kaj mandarenoj

La fajna kulinara arto de la china gastronomio kutime konservighis en la kuirejoj de kortego kaj mandarenoj. Kiel unu el la gravaj partoj de la pekina gastronomio, ghi jam popularighis inter la popolo.

La kortega gastronomio asimilis chiujn ekstraktojn de diversaj gastronomiaj sistemoj kaj formis sian propran stilon. La pladoj de kortega kulinara arto estas delikataj kaj havas belajn kolorojn, plachan formon kaj agrablan guston. Tre famaj estas la Imperiestra Kuirejo en la Somera Palaco kaj la Restoracio Fangshan (restoracio imitanta la kulinaran arton de kortego), kiuj povas liveri pli ol 800 specojn da manghajhoj de kortega kulinara arto.

Mandarena kulinara arto estas kulmino de familia kulinara arto. En Pekino vivis multaj mandarenoj kaj ili chiuj estis frandemaj. Pro tio kuirejoj en iliaj hejmoj estis tre lertaj kaj distingighaj.

Populara kulinara arto de malnova Pekino

Sur manghotablo de pekinaj indighenoj oni ne vidas abundon da viando, fishoj, kuriozaj chasajhoj au raraj maraj estajhoj. Sed oni ne devas preterlasi la shancon ghui pladojn de populara kulinara arto de indighenaj pekinanoj. Pekinanoj estas gastamaj kaj societemaj, kaj en restoracioj de gusto de malnova Pekino oni povas audi karakterizan saluton de kelneroj propran al Pekino. Ghuante pladojn en restoracio, la klientoj povas samtempe ghui ankau ludon de popolaj artistoj.

Gastronomioj de Jiangsu, Guangdong kaj Sichuan

La gastronomia sistemo de Jiangsu estas populara chefe en la provincoj Jiangsu kaj Zhejiang kaj Shanhajo. Ghia kulinara arto estas fajna, saucoj delikataj kaj gustoj moderaj.

La gastronomia sistemo de Guangdong estas populara chefe en Guangdong-provinco kaj Hongkong. Ghia kulinara arto estas fajna, specoj multaj, kaj marestajhoj estas ghiaj chefaj materialoj.

La gastronomia sistemo de Sichuan estas populara chefe en Sichuan-provinco, kaj gusto de kapsiko kaj zantoksilo (Zanthoxylum bungeanum) karakterizas ghiajn pladojn.

En Pekino estas multaj restoracioj de tiuj kulinaraj artoj.