Karaj ĉinaj esperantistoj, kaj tute aparte karaj ĉinaj Esperanto-instruistoj,

    Multaj eŭropanoj ankoraŭ rigardas min kun iom skeptika miro, kiam mi diras, ke la "estonteco estas via", alivorte de ĉinoj kaj ĝenerale de neeŭropaj popoloj, de tiuj popoloj, kiuj ĝis antaŭ mallonga tempo kaj ankoraŭ nun estis nomataj "evoluantaj". Tamen multegaj faktoj atestas, ke mi pravas. Simplaj faktoj, kiel la hodiaŭa fondo de la Ĉina Ligo de Esperantistaj Instruistoj, amasiĝas.

    Tamen la menso de homoj, kiu havas multegajn mirindajn funkciojn, ne povas adaptiĝi rapide al ŝanĝiĝantaj situacioj. Ĝiaj adaptiĝoj sin sekvas ĉefe tra la generacioj. Do, kiam ekzistos nova esperantista generacio, ĝi ja scios, ke la centro de la movado, kiu en la tempo a. K. (= antaŭ komputiloj) estis en Eŭropo nun estas ekster ĝi.

    Tio, aliflanke, nenion ŝanĝos en la kerno de la movado. Ĝi restos ankaŭ ekster Eŭropo lingvo de paco kaj de amikeco inter popoloj.

    En tiu senco mi sentas min tre honorata pro tio, ke mi havas la eblecon saluti vin hodiaŭ, en ĉi tiu tago, en kiu via ligo estas fondata. Mi certas, ke la nova ligo estos potenca helpilo por daŭrigi la disvastigon de Esperanto en Ĉinujo kaj per Cinujo en la mondo.

    Amike

Renato Corsetti

Eksa prezidanto de UEA