La nacioj de Chinio havas siajn proprajn kutimojn de manghado, vestado kaj loghado kauze de diferencoj en natura medio, sociaj kondichoj kaj ekonomio.

Han-nacianoj en la nordo de Chinio shatas tritikajn farunajhojn, kaj tiuj en la sudo shatas rizon. Ili preferas legomon, fabon, viandon, fishon, ovon k.a. kaj akcentas gastronomion. Mongoloj manghas chefe bovajhon, shafajhon kaj laktajhojn. Tibetanoj shatas sekalan farunajhon kaj la pashtistoj bovajhon, shafajhon, laktan teon kaj sekalan vinon. Ujguroj, kazahhoj kaj uzbekoj shatas bakitajn shafajhojn en malgrandaj pecoj, salatan rizajhon kaj flanon. Kore-nacianoj shatas mochion, malvarmajn vermichelojn kaj piklojn. Li-, Ghing-, Taj-, Blang- kaj Hani-nacianoj shatas machadi areknukson.

Manchurinoj shatas porti manchur-stilan robon, mongoloj mongolan robon kaj longajn botojn, tibetanoj tibetan robon kun zono kaj botojn. Kore-nacianoj shatas porti shuojn shipformajn. Ujguroj sendistinge de agho kaj sekso portas malaltan kvadratan chapeton. Virinoj de Ji-, Mjau- kaj Jau-nacioj shatas porti multfaldan jupon kaj sin ornami per orajhoj kaj arghentajhoj.

En regionoj dense longhataj de Han-nacianoj oni loghas en domo kun korto. Pashtistoj en la Interna Mongolio, Xinjiang, Qinghai kaj Gansu loghas en jurto, kaj Taj-, Ghuang-, Buji- k.a. nacimalplimultoj en la sudo de Chinio loghas en domo sur fostoj.

Nupto sur akvo

En Chinio celebro de datreveno de naskightago ne estas ghenerala kutimo. Oni okazigas celebron por naskightago en urboj pli multe ol en la kamparo, por infanoj pli multe ol por junuloj, kaj por maljunuloj pli multe ol por mezaghuloj. En la naskightago familianoj kolektighas kaj manghas longajn vermichelojn por esprimi bondeziron de longa vivo. En la urboj pli kaj pli multaj homoj shatas manghi torton europstilan.

Por geedzighi chinoj devas sin registri che difinita fako de loka registaro. Lau difino la minimuma edzightauta agho por viro estas 22 jaroj, kaj tiu por virinoj 20 jaroj. Registrigho che la registaro sufichas por atesti edzecon kaj ne estas nepre necese okazigi ceremonion. Sed kutime la chinoj shatas okazigi ceremonion kaj inviti al ghi parencojn kaj amikojn. Novgeedzoj donacas al ili bombonojn kaj chi tiuj donacas al la novgeedzoj monon au ion alian.

Oni okazigas simplan funebran ceremonion por forpasinto. Oni venas al sepultejo au la hejmo de la forpasinto por kondolenci. Chefe oni sepultas per kremacio. Blanka koloro estas tradicia funebra koloro, kaj la kondolencantoj portas sur sia brako rubandon el nigra shtofo au blankan floron.