La Makaa Speciala Administra Distrikto situas okcidente de la enfluejo de Perlo-rivero de Guangdong-provinco. Ghi distancas de Hongkong 40 marmejlojn kaj konsistas el Makao-duoninsulo kaj la insuloj Dangzai kaj Luhuan, kun totala areo de 24 kvadrataj kilometroj. De antikveco Makao estas parto de la teritorio de Chinio. En la 3-a jarcento a.K., kiam la Unua Imperiestro de Qin-dinastio unuigis Chinion, Makao jam estis prenita en la teritorion de Chinio kaj farighis parto de Panyu-gubernio de Nanhai-prefektujo. Poste ghi estis enstrekita en Xiangshan-gubernion (la nuna Zhongshan-gubernio).

En 1553 portugaloj subachetis la lokajn mandarenojn de Guangdong kaj akiris la rajton ankri siajn shipojn che la dokoj de Makao kaj fari negocojn. En 1557 ili eniris en Makaon kaj loghis tie. Post la Opia Milito en 1840, profitante la malvenkon de la registaro de Qing-dinastio, ili okupis la insulojn Dangzai kaj Luhuan. En 1887 la portugala registaro devigis la kortegon de Qing-dinastio subskribi la "Traktaton de Chinio kaj Portugalio (Projekto)" kaj la "China-Portugalan Pekinan Traktaton", kiuj difinis, ke "Portugalio chiam administros Makaon kaj de ghi dependantajn lokojn, same kiel aliajn lokojn administratajn de Portugalio". De tiam Portugalio okupadis Makaon. Sed la china popolo neniam agnoskis la supre menciitajn neegalrajtajn traktatojn. La registaro de la China Popola Respubliko multfoje deklaris, ke Makao chiam estas parto de la teritorio de Chinio kaj la problemo pri Makao estas postlasita de la historio, kaj chiam volas solvi la historian problemon pere de paca intertraktado en konvena tempo.

En 1979, kiam Chinio kaj Portugalio starigis diplomatiajn rilatojn, la portugala registaro agnoskis, ke Makao estas parto de la teritorio de Chinio. Ambau registaroj interkonsentis solvi la problemon pri Makao pere de intertraktado de la du registaroj en konvena tempo. De junio de 1986 ghis marto de 1987, post 4-foja intertraktado, ambau registaroj venis al interkonsento kaj oficiale subsiribis en la 13-a de aprilo de 1987 la "Komunan Deklaron de la China Popola Respubliko kaj la Portugala Respubliko pri la Problemo pri Makao". La deklaro klare difinis, ke la registaro de la China Popola Respubliko reprenos la suverenecon super Makao en la 20-a de decembro de 1999.

En la 20-a de decembro de 1999 la registaroj de Chinio kaj Portugalio akurate okazigis la ceremonion por transdono kaj repreno de regpotenco de Makao kaj oni fondis samtempe la Makaan Specialan Administran Distrikton. En la sama tago ekpraktikighis la "Fundamenta Legho de la Makaa Speciala Administra Distrikto" aprobita de la Unua Sesio de la Oka Tutlanda Popola Kongreso en marto de 1993.

La china registaro praktikas en Makao la fundamentajn politikojn "Unu lando, du sistemoj", "Makaanoj administras Makaon" kaj altgradan autonomecon. La Makaa Speciala Administra Distrikto ghuas altgradan autonomecon kaj praktikas la politikan sistemon, ekonomian sistemon kaj kultura-edukan sistemon similajn al tiuj en Hongkong. La nuna chefo de la Makaa Speciala Administra Distrikto estas Edmund Ho Hau-wah.