Akvofalo de la Flava Rivero che Hukou

La konsisto kaj situo de la teraj richfontoj de Chinio havas tri karakterizajhojn: 1. Trovighas multaj specoj da tero: agraro, arbaro, herbejo, dezerto kaj malprofundajho estas vaste dislokitaj; 2. Multaj estas montaroj kaj altebenajhoj, sed malmultaj ebenajhoj kaj basenoj; 3. Malegale dislokighas la agroj: kulturataj kampoj lokighas chefe en la oriento de Chinio, dum herbejoj en la nordo kaj okcidento, kaj arbaroj chefe en la nordoriento kaj la malproksimaj limregionoj en la sudokcidento.

Chinio havas 94.97 milionojn da hektaroj da agroj. Ili lokighas chefe en la Nordorienta Ebenajho, Nordchinia Ebenajho, Ebenajho de Meza kaj Malsupra Yangzi-rivero, Delto de Perlo-rivero kaj Sichuan-baseno. Sur la Nordorienta Ebenajho etendighas nigra fekunda tero, kiu tre taugas por tritiko, maizo, sojfabo, sorgo, lino kaj beto. Sur la Nordchinia Ebenajho kovrita de dika tavolo da bruna grundo kreskas chefe tritiko, maizo, milio kaj kotono. La tero de la Ebenajho de Meza kaj Malsupra Yangzi-rivero estas malalta kaj ebena. Tie trovighas multaj riveroj kaj lagoj tre favoraj por kulturado de rizo kaj bredado de fishoj. Krome tie produktighas ankau teo kaj silko. En Sichuan-baseno la grundo estas viola, klimato varmeta kaj humida, kaj agrikulturajhoj kreskas en chiuj sezonoj. Tie multe produktighas rizo, kolzo kaj sukerkano.

Pashtejo sur Tianshan-monto de Xinjiang

Chinio havas 133.7 milionojn da hektaroj da arbaroj. En la Granda Xin'an-montaro kaj Malgranda Xin'an-montaro de la Nordoriento de Chinio kreskas la plej vastaj naturaj arbaroj el pinglofoliaj rugha pino, falfolia pino kaj flavflora pino kaj larghfoliaj betulo, kverko, ulmo k.a. En sudokcidenta Chinio kreskas naturaj arbaroj el piceo, abio kaj Yunnan-pino, kaj ankau valoraj pampelmusarbo, pterokarpo, kamforarbo, nanmu-arbo kaj palisandro. En Xishuangbanna en suda Yunnan-provinco kreskas tropika larghfolia arbaro el pli ol 5000 specoj da vegetaloj.

Chinio havas 400 milionojn da hektaroj da herbejoj, kie funkcias multaj bazoj de brutobredado. La Interna Mongolio estas la plej vasta natura pashtejo de Chinio, kaj bovoj kaj chevaloj de Sanhe kaj Menggu-shafo ghuas renomon. Sude kaj norde de Tianshan-montaro en la Xinjiang-a Ujgura Autonoma Regiono estas la plej gravaj naturaj gresejoj kaj bazoj de bonrasaj dombestoj. Chevaloj de Ili kaj fajnlanaj shafoj estas vaste konataj.

La absolutaj nombroj de agroj, arbaroj kaj herbejoj de Chinio okupas la unuan lokon de la mondo, sed la pokapa kvanto estas malgranda, precipe tiu de agro. Meznombre chiu homo havas nur 0.08 hektaron da agro, nome trionon de tiu de la meznombra areo de la mondo.

Chinio havas richan rezervon da minoj. Ghis nun Chinio konstatis 153 specojn da minoj, kies totala rezervokvanto okupas la trian lokon en la mondo. Chinio havas grandan rezervokvanton de karbo, petrolo, naturgaso, oleskisto, uranio kaj torio. La rezervokvanto de karbo atingis 1007.1 miliardojn da tunoj, kiuj lokighas chefe en Shanxi-provinco kaj la Autonoma Regiono de Interna Mongolio en norda Chinio. Petrolo trovighas chefe en la nordokcidento de Chinio, kaj ankau en nordorienta kaj norda Chinio kaj kontinentaj bretoj en la orientaj maroj. La rezervokvantoj de fero, mangano, vanado kaj titano estis konstatitaj. La rezervokvanto de fermino estas 45.9 miliardoj da tunoj, kiuj lokighas chefe en la nordoriento, nordo kaj sudokcidento de Chinio. En Anshan-Benxi de Liaoning-provinco, oriento de Hebei-provinco kaj Panzhihua de Sichuan-provinco estas multaj grandaj ferminejoj. Ankau la rezervokvantoj de volframo, stano, antimono, zinko, molibdeno, plumbo kaj hidrargo estas grandaj en la mondo. La rezervokvanto de rarateraj metaloj estas pli granda ol tiu de la tuta mondo.