La viroj de Bau'an-nacio portas blankan jakon butonumatan en la mezo, nigran veshton ekster la jako kaj nigran au bluan pantalonon. En iuj lokoj ili portas oblikve butonumatan kitelon, zonon kaj botojn. En festotagoj ili portas nigran kordurojan kitelon kun faldata kolumo, granda antaupeco kaj borderita rando. La zono estas 5-futa kolora rubando. Ili portas chapelon kaj longajn botojn el bovledo kaj en vintro brunan peltan jakon. Same kiel viroj de Huj-nacio, ili shatas porti blankan rondan senvizieran chapeton kaj blankan kitelon. La virinoj portas robon butonumatan che la dekstra flanko, longan pantalonon kaj senbutonan veshton kun ronda kolumo, faritan el kordurojo de purpura, verda au aliaj freshaj koloroj. La veshto estas borderita. Same kiel virinoj de aliaj islamaj nacimalplimultoj, la virinoj de Bau'an-nacio shatas porti kaptukon. Fraulinoj portas verdan kaptukon, junaj virinoj la nigran kaj maljunulinoj la blankan. Knabinoj havas longajn harplektajhojn kovritajn per kolora gazo, kaj en festotagoj ili portas rughan au verdan chapelon.

Bau'an-glavo

Bau'an-glavo estas fierinda metiajho de la nacio. Ghi estas kaj ornamajho kaj bona donaco por amatoj kaj amikoj. La glavo estas delikata, belforma kaj akra. Ghi ghuas renomon. Ghia farado konsistas el 80 procederoj, ekzemple sole por fari tenilon, oni devas prilabori latunan lamenon, kupran draton, bovan kornon kaj plastan pecon, kunglui ilin kaj gravuri la kunmetajhon je diversaj desegnoj. Oni poluras ghin ghis ghi rebrilas. La desegnoj estas tre diversaj, ekzemple Stela Sepjado, Umeflora Kvinopo, Draka Duopo k.a. Chiu familio de la nacio havas unu membron kiel ferajhiston, kaj chiu ferajhisto havas sian propran markon. Pri chiu marko estas bela legendo, tragedia rakonto au io alia.