Junuloj de Buji-nacio portas mallongan jakon butonumatan en la mezo, longan larghan pantalonon kaj turbanon el nigra au krade desegnita shtofo. Maljunuloj portas veston kun largha antaupeco au kitelon. Vestoj de la virinoj varias lau lokoj. La virinoj kutime girlande spiraligas la harplektajhon sur la verto kaj kovras ghin per nigra kaptuko au kaptuko kun krada desegno. Ili portas jakon kun granda antaupeco kaj largha kolumo, vakstinkturitan plisitan jupon kaj zonon kun belaj desegnoj. Ili shatas ornami sin per arghentaj braceletoj, orelringoj kaj kolieroj. Iliaj shuoj estas broditaj kaj pintaj.

Florsako

En festotagoj gejunuloj de la nacio kolektighas kaj sin amuzas per jhetado de florsako. Florsako povas esti atestilo de amo. Ghi estas kvadrata kaj farita el kotona au silka shtofo. Oni brodas sur ghi floron, herbon, papilion, birdon au geometriajn figurojn. La sako estas remburita per brano au kotonaj semoj. Che la kvar anguloj estas bidoj kaj koloraj kvastoj.

Dorsosako

Buji-oj kutimas kunporti dorsosakon. La sako estas farita el kruda shtofo kun krada desegno en blua kaj blanka koloroj au en blua koloro de diversaj nuancoj. La shtofo estas fortika kaj senornama. Rimeno interligas ambau flankojn de la sako kaj che la ekstremoj de la rimeno estas kvastoj. Alispeca sako estas farita el nigra kruda shtofo kaj ornamita per broditaj geometriaj figuroj per roza, orangha, verdeta kaj blanka fadenoj. Ghia alia flanko estas farita el kruda shtofo kun krada desegno. Same ghi havas rimenon por esti portebla.