Vestoj de dong-oj dividighas en du kategoriojn, nome la nordan kaj sudan. En la norda parto de la regiono loghata de dong-oj facila estas la trafiko, alta la produkta nivelo kaj progresa la kulturo, tial la vestoj de viroj estas preskau samaj al tiuj de Han-nacio, kaj nur vestoj de virinoj konservas la tradician stilon. La eksteraj vestoj de la virinoj estas nigraj kaj butonumataj antau la brusto, la kolumo ronda, la shultrumoj bunte ornamitaj. La jako longas ghis la femuro kaj che la angulo videblas rugha interna subvesto. La manikoj longas iom trans la kubuto kaj la manikumoj estas borderitaj per punto. La interna vesto estas blanka au lazureta, kaj la manikoj estas pli longaj ol tiuj de la jako, ghis la pojno. La pantalono estas nigra kaj la broditaj shuoj havas suprenlevitan pinton.

Kapornamoj kaj arghentaj ornamoj estas akcentataj de la virinoj de Dong-nacio. La virinoj havas longan hararon ligitan per rugha shnureto kaj volvitan sur la verto. Foje ili kovras la hararon per nigra tuko, alpinglas arghentan pinglon kaj arghentan kombilon kaj similan arghentan diademon. Che la kolo estas 5 ringoj de malsamaj grandecoj. Antau la brusto pendas 5 arghentaj chenoj kaj unu arghenta pendajho, kiuj rolas kiel amuleto. Che la pojno estas arghenta braceleto.

La vestoj de sudaj dong-oj estas malsamaj al tiuj de la nordaj. En la sudo la trafiko ne estas facila kaj oni portas vestojn en antikva stilo. Tie la virinoj estas tre lertaj en brodado kaj iliaj vestoj estas tre delikataj. La virinoj portas jakon sen kolumo. La desegnoj sur la vestoj temas pri drako kaj fenikso. Ilia jupo havas multajn faldojn kaj la shuoj havas suprenlevitan pinton. Ankau ili portas arghentan diademon el multaj pecoj. Ili kovras la hararon per nigra tuko kaj la pantalono estas tre largha. Ili portas pajlajn sandalojn au nenion.

La virinoj de Dong-nacio portas ornaman talisakon. Ghi estas brodita en formo de kalabaso, en longo de 12 cm. kaj largho de 8 cm. che la bazo. Sur helverda fono oni brodas herbojn, florojn kaj bestetojn per silkaj fadenoj de roza, persikrugha, indiga, verda, nigre verda, ora kaj arghenta koloroj. La rando de la sako estas borderita per rugha kaj blua punto kaj ambauflanke pendas rugha kaj verda kvastoj.