Chevalosta kordmuzikilo de Ghuang-nacio popularighas en la lokoj de Ghuang-nacianoj en la Guangxi-a Ghuang-nacia Autonoma Regiono kaj Yunnan-provinco.

La origino de tiu muzikilo rilatas vaste cirkulantan rakonton. Antau longe estis paro da gejunuloj, kiuj kreskis kune en la vilagho. Ili enamighis kaj la junulo A-Lie ofte ludis sian krudan kordmuzikilon, kiun li mem faris, por vershi sian koron. La sagha junulino A-Ran respondis al li per kantado. Sed la potenca tribestro shatis shin kaj shian chevalon kun kvar neghblankaj hufoj. Li forrabis shin kaj fermis shin en senluman chambron de sia domo. Li volis rajdi sur la chevalo, sed ghi dejhetis lin kaj li buchis ghin en kolerego. Li deshiris ghian felon kaj eltiris ghiajn ostojn kaj jhetis ilin antau A-Ran. Li devigis shin edzinighi al li. En granda malghojo shi petis sendi al A-Lie faskon da vostharoj kaj femuran oston de la chevalo. A-Lie falis en grandan malghojon. Li faris el la haroj kaj osto de la chevalo kordmuzikilon kaj ornamis ghin per skulptita chevalkapo. La sono de la muzikilo laute resonadis en la valo. Poste A-Lie elsavis A-Ran kaj formigris. Kien ili venis, tie oni audis belan muzikon de la kordmuzikilo.

La tradicia chevalosta kordmuzikilo longas 46-60 cm. La stango de muzikilo estas farita el ligno au bambuo, la resonbareleto -- el femura osto de chevalo. La du kordoj estas silkfadenaj au shtalaj, kaj la archo estas farita el maldika bambua vergo kaj vostharoj de chevalo. La sono estas iom akuta. Antaue oni ludis la muzikilon en akompano kaj poste oni reformis ghin kaj elfaris altsonan kaj mezasonan chevalostajn kordmuzikilojn, kiujn oni ludas en solludo, kunludo, akompano kaj koncherto.