Ailao-montregiono en la suda parto de Yunnan-provinco estas bela kaj fekunda kun milda klimato kaj densaj arbaroj. Tie loghas hani-oj, unu el la chinaj nacimalplimultoj. La hani-oj estas serenaj, fervoraj kaj honestaj. Ili vivas kiel en granda familio. Tion bone manifestas ilia longdraka festeno.

La festeno okazas kelkajn fojojn chiujare. Por soleni la Printempan Feston, sesamonatan kaj dekamonatan festojn lau la china luna kalendaro, la hani-oj eldomigas tablojn, kunigas ilin unu kun alia kaj fine formas longan tablaron sur la vilagha strato por la festeno. Char la festena tablaro estas tre longa, oni nomas la festenon longdraka festeno. Chiuj vilaghanoj eldomighas por kune celebri la feston.

Frumatene, oni purigas la vilaghon kaj portas novajn naciajn vestojn. La knabinoj surhavas brilan arghentan kapornamon kaj vestojn kun longaj arghentaj chenoj tintantaj che chiu pasho. La viglaj knaboj lauvice tamburadas kaj gongadas che vilaghlimo. Ju pli fore la sono audighas, des pli richa montrighas la vilagho.

La vino kaj pladoj de la festeno estas preparitaj de hani-oj mem. Kiu preparas pli da bongustaj pladoj, tiu sentas sin fiera. Tial oni shtele konkuras por doni abundajn pladojn. Poste chiuj familiestroj surtabligas memfaritajn sorg-vinon kaj diversajn pladojn. Sur chiu tablo bonodoras almenau 20 pladoj.

Che la komenco de la festeno oni sidigas 2 respektindajn maljunulojn sur honoraj sidlokoj, kiel prezidantojn de la festeno. Ili, noblaj kaj altprestighaj, devas ne nur havi filojn kaj nepojn, sed ankau esti laboremaj en terkulturo kaj lertaj en dommastrumado. Gvidate de ili, oni altablighas. Che la tablo la maljunuloj familiare interparolas kaj la patrinoj de infanoj babilas pri hejmaj aferoj, dum la gejunuloj ghoje shercadas. En la tuta vilagho regas solidareco kaj gajeco.

Post kiam la festen-prezidantoj donas salutvortojn, oni krias "Shashaoluo!". Tiu solena kaj kruda krio signifas adiaui la malnovan jaron kaj bonvenigi la novan kaj celebri la richan rikolton. La longdraka festeno komencighas per mangho de glu-riza bulo, kio signifas, ke chiuj vilaghanoj unuighas kiel glu-riza bulo.

La hani-oj kutime manghas chiu 2 bovlojn da rizo. Se oni manghas tre malmulte, li devas 2-foje preni manghajhon, char la hani-oj opinias, ke en la mondo nur malliberuloj kaj almozuloj manghas unu bovlon da rizo. Tial oni nepre aldonas al vi manghajhon, kiam vi gastas che hani-oj. Che la tablo la junuloj aldonas de tempo al tempo vinon kaj manghajhon al la maljunuloj kaj gastoj. Kiam la maljunuloj per unu spiro eltrinkas plenglason da vino, chiuj aliaj cheestantoj huraas. En la vilagho regas gaja kaj felicha atmosfero.

Post mangho audighas tamburado kaj gongado. La 2 prezidantoj ekdancas lau takto de la tamburado, dum la aliaj krias shashaoluon por ilin akompani. Post kiam ili finas sian dancon chirkau la festenejo, la aliaj ekdancas, svingante poshtukon. Tio plene montras la unuighon kaj reciprokan helpon de la hani-oj, ilian amon al la vivo kaj prosperon de la vilagho. La festeno dauras ghis sunsubiro.

Nokte oni bruligas kampfajron. Che la fajro la gejunuloj frapas tamburojn el bovledo kaj gongojn, ludas 3-kordajn instrumentojn kaj bambuajn flutojn, kantas hani-ajn popolkantojn kaj dancas belajn dancojn. La gaja celebrado dauras ghis sunlevigho en la sekvanta mateno.